ශ්‍රී ලංකා විදේශ ගමන් බලපත්‍රය Henley විදේශ ගමන් බලපත්‍ර දර්ශකයේ 96 වැනි ස්ථානයේ සිට 91 වැනි ස්ථානය දක්වා ස්ථාන පහක් ඉදිරියට පැමිණ ඇත.

ශ්‍රී ලංකා විදේශ ගමන් බලපත්‍රය පසුගිය වසරේ ද ස්ථාන හතරකින් ඉහළ ගොස් තිබිණි.

2025 Henley විදේශ ගමන් බලපත්‍ර දර්ශකය රටවල් ශ්‍රේණිගත කරන්නේ, ඒවායේ හිමිකරුවන්ට පූර්ව වීසා බලපත්‍රයක් නොමැතිව ඇතුළු විය හැකි ගමනාන්ත ගණන මතය.

දැනට ශ්‍රී ලංකාවට ලෝකයේ ගමනාන්ත 42කට වීසා රහිත ප්‍රවේශය ඇත.

සිංගප්පූරු විදේශ ගමන් බලපත්‍ර හිමියන්ට ගමනාන්ත 193කට වීසා රහිත ප්‍රවේශය හිමිවේ.

ජපානයේ සහ දකුණු කොරියාවේ විදේශ ගමන් බලපත්‍ර දරන්නන් රටවල් 190කට වීසා රහිත ගමන් සමඟ සමීප දෙවැනි ස්ථානය හිමිව තිබේ.

යුරෝපීය ගමන් බලපත්‍ර හතක් තුන්වැනි ස්ථානයේ පසුවන අතර, එම රටවල් වන්නේ ඩෙන්මාර්කය, ෆින්ලන්තය, ප්‍රංශය, ජර්මනිය, අයර්ලන්තය, ඉතාලිය සහ ස්පාඤ්ඤයයි.

එම රටවල විදේශ ගමන්බලපත්‍ර හිමියන්ට ගමනාන්ත 189කට වීසා රහිත ප්‍රවේශය හිමිවේ.