May 22, 2026
තමන්ගේ ආගමික විශ්වාසයන් සම්බන්ධයෙන් එල්ල වූ චෝදනා ප්රතික්ෂේප කරමින් තම ක්රිස්තියානි ඇදහීම් අන් අයට බාධාවක් වූ බවට හෝ ක්රිකට් පරිපාලනයේ සාධාරණත්වයට එය බාධාවක් වන බවට සාක්ෂි ඇත්නම් ඉදිරිපත් කරන ලෙස ශ්රී ලංකා ක්රිකට් පරිවර්තන කමිටුවේ සභාපති එරාන් වික්රමරත්න වගකිවයුතු මාධ්යවලින් ඉල්ලා සිටියේය.
ක්රිස්තියානි දේවගැතිවරයකු ලෙස බොහෝ දෙනා හඳුනන වික්රමරත්න ප්රකාශ කළේ, ක්රිකට් ක්රීඩාව සහ තමන්ට පැවරී ඇති වගකීම් රටේ ජනතාව බෙදා වෙන් කිරීමට හේතු වන සියලුම කරුණුවලින් බැහැරව ඉටු කරන බවයි.
“මම ගියේ හොඳ පාසලකට, මම ඒක මොකක්ද කියලා කියන්නෙ නැහැ. මගේ පන්තියේ සිසුන් 35 දෙනෙක් හිටියා. ඒ අතරින් බෞද්ධ නොවන එකම ශිෂ්යයා මම විතරයි. නමුත් මම එම පාසලේ ප්රධාන ශිෂ්ය නායකයා වුණා. එතන කිසිම ප්රශ්නයක් වුණේ නැහැ. මම බැංකුවක් පිහිටෙව්වා, එතනත් ප්රශ්නයක් වුණේ නැහැ. මම ජාතික සංවර්ධන බැංකුවේ (NDB) ප්රධානියා ලෙස කටයුතු කළා, ප්රශ්නයක් වුණේ නැහැ. මම ව්යවසාය රාජ්ය අමාත්යවරයා ලෙස කටයුතු කළා, කිසිම ප්රශ්නයක් වුණේ නැහැ. මම මුදල් නියෝජ්ය අමාත්යවරයා ලෙස කටයුතු කළා, එතනත් කිසිම ප්රශ්නයක් වුණේ නැහැ,” යැයි කොළඹ රාජකීය විද්යාලයේ ආදි ශිෂ්යයකු මෙන්ම 1970 දශකයේ මැද භාගයේදී එහි ක්රිකට් කණ්ඩායමේ ආරම්භක පිතිකරුවකු ලෙස කටයුතු කළ වික්රමරත්න පැවසීය.
ශ්රී ලංකා ක්රිකට් ආයතන පරිශ්රයේ ඊයේ පැවැති මාධ්ය හමුවකදී මාධ්යවේදියකු නැඟූ ප්රශ්නයකට පිළිතුරු දෙමින් ඔහු කියා සිටියේ, “මම මේ දේවල් ගැන කතා කරන්න කැමති කෙනෙක් නෙවෙයි. නමුත් ඔබ මගෙන් මේ ප්රශ්නය අහපු නිසා මම ඒ ගැන පැහැදිලි කළා. මේ ප්රශ්නය ඇසීම ගැන ඔබට ස්තුතියි,” යනුවෙනි.
රටේ අනෙකුත් පොදු වේදිකාවල මෙන්ම මෙහිදී ද ආගමික වෛරීභාවයකට කිසිදු ඉඩක් නොතබන බවත්, ක්රීඩකයන් තේරීම ආගම, පන්තිය, කුලය හෝ ජාති භේද පදනම් කරගෙන නොව දක්ෂතාව මතම පමණක් සිදු කරන බවත් ඔහු වැඩිදුරටත් අවධාරණය කළේය.
