June 25, 2026
යාපනය අන්තර්ජාතික ක්රිකට් ක්රීඩාංගණ ව්යාපෘතිය සඳහා යෝජිත මුල් සැලසුම තමන්ගේ වත්මන් මූල්ය ධාරිතාවයෙන් ඔබ්බට ගිය එකක් බව නිගමනය කිරීමෙන් පසු, ශ්රී ලංකා ක්රිකට් ආයතනය එම ව්යාපෘතියේ පරිමාණය අඩුකිරීමට පියවර ගනිමින් සිටියි.
බ්රහස්පතින්දා පැවැති මාධ්ය හමුවකදී අදහස් දක්වමින් ශ්රී ලංකා ක්රිකට් ආයතනයේ ගෞරවනීය ලේකම් ප්රකාශ් ෂාෆ්ටර් කියාසිටියේ, පවතින ප්රතිපාදනවලට අනුකූලව මෙම ව්යාපෘතියේ විෂය පථය නැවත ඇගයීමට ලක්කරමින් එය සමාලෝචනය කරමින් පවතින බවයි.
“මේ වන විට ව්යාපෘතියේ වැඩකටයුතු සිදුවෙමින් පවතිනවා. අපට අවශ්ය ව්යාපෘතියේ අවසාන විෂය පථය කුමක්ද යන්න අප නැවත සමාලෝචනය කළ යුතුයි. මොකද මුලින් අනුමත කරන ලද ව්යාපෘතිය පිළිබඳ අපගේ සමාලෝචනයට අනුව, එය ශ්රී ලංකා ක්රිකට් ආයතනයේ සීමාවන්ගෙන් ඔබ්බට ගිය එකක්. එය නිමකිරීම සඳහා වත්මන් මූල්ය ශක්තියක් අපට නැහැ,” යැයි ෂාෆ්ටර් පැවසීය.
යාපනය ප්රදේශයේ ක්රිකට් යටිතල පහසුකම් සංවර්ධනය කිරීමට ශ්රී ලංකා ක්රිකට් ආයතනය තවදුරටත් කැපවී සිටින නමුත්, ව්යාපෘතියේ පරිමාණය සැලකිය යුතු ලෙස අඩුකරන බව ඔහු අවධාරණය කළේය.
“යාපනය ප්රදේශයේ ක්රිකට් ක්රීඩාංගණයක් ඉදිකිරීමට අප කැපවී සිටිනවා. නමුත් අප සතු වත්මන් ප්රතිපාදන ධාරිතාවන් සැලකිල්ලට ගනිමින් යාපනය ව්යාපෘතිය සඳහා අප කොපමණ මුදලක් ආයෝජනය කරන්නේද යන්න පිළිබඳව අප නැවත සලකා බලමින් සිටිනවා,” යැයි ඔහු පැවසීය.
නව අන්තර්ජාතික ක්රිකට් ක්රීඩාංගණයක් ඉදිකිරීම සඳහා අවශ්ය මූල්ය සම්පත් මේ මොහොතේ පාලක මණ්ඩලය සතුව නොමැති බවද ෂාෆ්ටර් වැඩිදුරටත් සඳහන් කළේය.
“මේ මොහොතේ යාපනයේ අන්තර්ජාතික ක්රිකට් ක්රීඩාංගණයක් සඳහා ආයෝජනය කිරීමට තරම් අරමුදල් අප සතුව ඇතැයි මම සිතන්නේ නැහැ,” ඔහු පැවසීය.
බොහෝ නියාමන අනුමැතීන් දැනටමත් ලබාගෙන තිබුණද, සංශෝධිත ව්යාපෘතිය යටතේ මුලින් යෝජිත ජාත්යන්තර ක්රීඩාංගණය, ක්රීඩා නගරය සහ නිවාස ව්යාපෘතිය වෙනුවට ක්රිකට් ක්රීඩාංගණයක් පමණක් සංවර්ධනය කිරීම කෙරෙහි අවධානය යොමු කිරීමට අපේක්ෂා කරන බව ඔහු පැහැදිලි කළේය.
“මුල් ව්යාපෘතිය අන්තර්ජාතික ක්රීඩාංගණයකින්, ක්රීඩා නගරයකින් සහ නිවාස ව්යාපෘතියකින් සමන්විත වුණා. නමුත් ශ්රී ලංකා ක්රිකට් ආයතනය සතු පවතින අරමුදල්වල සැබෑ තත්ත්වය සහ ව්යාපෘතියේ විශාලත්වය නිසා, මේ අවධියේදී ඒ පිළිබඳව සලකා බැලිය නොහැකි බව අපට හැඟීයනවා,” යැයි ෂාෆ්ටර් පැවසීය.
