2011 අංක 42 දරන මුදල් ව්‍යාපාර පනත උල්ලංඝනය කරමින් මහජනතාවගෙන් නීතිවිරෝධී ලෙස තැන්පතු භාරගෙන ඇති ‘සිංහ කැපිටල් ඉන්වෙස්ට්මන්ට් ලිමිටඩ්’ (Sinha Capital Investment Limited) සමාගමට සහ එහි අධ්‍යක්ෂවරුන්ට වහාම ක්‍රියාත්මක වන පරිදි මහජනතාවගෙන් තැන්පතු භාරගැනීම තහනම් කිරීමට ශ්‍රී ලංකා මහ බැංකුව පියවර ගෙන ඇත.

ශ්‍රී ලංකා මහ බැංකුව විසින් සිදුකරන ලද විශේෂ විමර්ශනයකින් අනතුරුව මෙම තීරණයට එළඹ තිබේ.

එම විමර්ශනයේදී හෙළි වී ඇත්තේ අදාළ සමාගම මෙන්ම, අදාළ කාලපරිච්ඡේදය තුළ එහි අධ්‍යක්ෂවරුන් ලෙස කටයුතු කළ පුද්ගලයන් ද මෙම නීතිවිරෝධී තැන්පතු ලබාගැනීමේ ක්‍රියාවලියට සෘජුවම වගකිව යුතු පාර්ශවයන් වන බවයි.

ඒ අනුව, මහජනතාවගෙන් තැන්පතු භාරගැනීමේ කටයුතුවලින් වහාම වැළකී සිටින ලෙස සිංහ කැපිටල් ඉන්වෙස්ට්මන්ට් ලිමිටඩ් සමාගම වෙත සහ එහි අදාළ අධ්‍යක්ෂවරුන් වෙත මහ බැංකුව විසින් නිල වශයෙන් නියෝග කර ඇත.

තැන්පතු භාරගැනීම සඳහා නීත්‍යනුකූල අවසරයක් නොමැති මෙවැනි සමාගම් සමඟ ගනුදෙනු කිරීමේදී අතිශයින්ම සැලකිලිමත් වන ලෙස මහ බැංකුව මහජනතාවට දැඩි ලෙස උපදෙස් දෙයි.

කිසියම් මූල්‍ය ගනුදෙනුවක් හෝ මුදල් තැන්පත් කිරීමක් සිදු කිරීමට පෙර, අදාළ ආයතනය ශ්‍රී ලංකා මහ බැංකුව විසින් නිසි පරිදි බලපත්‍ර ලබා දී නියාමනය කරනු ලබන ආයතනයක් දැයි මැනවින් තහවුරු කරගන්නා ලෙස ද මහ බැංකුව වැඩිදුරටත් අවධාරණය කරයි.