June 16, 2023
ශ්‍රී ලංකාවේ ජාතික උරුමයන් තම රජයෙන්ම ආරක්ෂා කරගැනීමට එක්සත් ජාතීන්ගේ අධ්‍යාපනික, විද්‍යාත්මක හා සංස්කෘතික සංවිධානයට (UNESCO) ලිපියක් යැවීමට අදහස් කරන බව පාර්ලිමේන්තු මන්ත්‍රී උදය ගම්මන්පිල පවසයි.
උතුරු නැඟෙනහිර පුරාවිද්‍යා උරුමයන් තම රජයෙන් ආරක්ෂා කර ගැනීමට මහජනතාවට සිදුව ඇතැයි ද මන්ත්‍රීවරයා චෝදනා කරයි.
පුරාවිද්‍යා දෙපාර්තමේන්තුවේ අධ්‍යක්ෂ ජනරාල්වරයාගේ ඉල්ලා අස්වීම සම්බන්ධයෙන් පසුගියදා ඇති වූ ආන්දෝලනාත්මක තත්ත්වය පිළිබඳව ද මන්ත්‍රීවරයා පෙන්වාදෙයි.
පුරාවිද්‍යා භූමියක ඉඩම් ලබාදීමේ ගැටලුවක් සම්බන්ධයෙන් ජනාධිපති රනිල් වික්‍රමසිංහ විසින් කරන ලද ප්‍රසිද්ධ තරවටුවකින් පසුව අධ්‍යක්ෂ ජනරාල්වරයා ඉල්ලා අස්වී ඇත.
මෙම උරුමයන් ආරක්ෂා කිරීමට වෙහෙසෙන්නේ බෙදුම්වාදීන්ගෙන් හෝ අන්තවාදීන්ගෙන් නොව තමන්ගේම රජයෙන් බවද ඔහු පවසයි.
දෙමළ ජාතික සන්ධානයේ මන්ත්‍රීවරුන්ගේ අසත්‍ය සහ නොමඟ යවන සුළු වාර්තා කිසිදු පැකිළිමකින් හෝ විමසීමකින් තොරව ජනාධිපතිවරයා පිළිගෙන ඇති බවට ඔහු චෝදනා කරයි.
ජූනි 21 කුරුන්දි රජමහා විහාරයට පැමිණ දෙමළ සන්ධානයේ අසත්‍ය තොරතුරු හෙළිදරව් කරන බව මන්ත්‍රීවරයා පවසයි.
රටේ උරුමය සුරැකීමට දැන්වත් රටේ පුරවැසියන් ක්‍රියා කරන ලෙසද මන්ත්‍රීවරයා ඉල්ලා ඇත.
මේ අනුව, පාර්ලිමේන්තු මන්ත්‍රී ශානක්‍යන් රසමානික්කම් පුරාවිද්‍යා අධ්‍යක්ෂ ජනරාල්වරයා ලෙසත්, එම්.ඒ. සුමන්තිරන් සංස්කෘතික කටයුතු ඇමැතිවරයා ලෙසත්, ජනාධිපතිවරයා විසින් පත්කිරීමට ඉඩ ඇතැයි පෙන්වාදෙන මන්ත්‍රීවරයා, එවැනි ව්‍යසනයක් සිදුවීමට පෙර වහාම ක්‍රියා කිරීම අත්‍යවශ්‍ය බව ද පෙන්වාදෙයි.
වෙනත් රටවල පුරවැසියන් තම ජාතික උරුමයන් ආරක්ෂා කරන ලෙස රජයෙන් ඉල්ලා සිටින බවත්, ශ්‍රී ලංකාවේ යථාර්ථය එහි ප්‍රතිවිරුද්ධ බවත්, ඔහු සඳහන් කරයි.
“අපේ උරුමය අපේම රජයෙන් ආරක්ෂා කර ගැනීමට උදව් කරන ලෙස අපි යුනෙස්කෝවෙන් ලිඛිත ඉල්ලීමක් කරන්නෙමු,” ඔහු වැඩිදුරටත් සඳහන් කරයි.
