තොරතුරු පද්ධති සහ කළමනාකරණ දෙපාර්තමේන්තුවේ සේවිකාවකට කිසිදු ලිංගික හිරිහැරයක් සිදුවී නොමැති බව ඒ සම්බන්ධයෙන් කරන ලද බාහිර පරීක්ෂණයකින් නිගමනය කර ඇතැයි පාර්ලිමේන්තු පරිපාලනය විසින් නිකුත් කරන ලද නිවේදනයක දැක්වේ.

විශ්‍රාමික මහාධිකරණ විනිසුරු සුජාතා අලහප්පෙරුම විසින් සකස් කරන ලද අවසන් වාර්තාව නොවැම්බර් 24 වැනිදා කථානායක ජගත් වික්‍රමරත්න වෙත ඉදිරිපත් කර තිබේ.

සේවිකාව ලිංගික හිරිහැරයකට ලක්ව ඇති බවට චෝදනා කරමින් 2025 ජනවාරි 7 වැනිදා පාර්ලිමේන්තු මන්ත්‍රී මුජිබර් රහ්මාන් විසින් සභා ගර්භයේදී මතු කරන ලද ප්‍රකාශයකින් පසුව මෙම පරීක්ෂණය ආරම්භ කරන ලදී.

පාර්ලිමේන්තුව විසින් මූලික අභ්‍යන්තර පරීක්ෂණයක් පවත්වන ලද නමුත් පැමිණිලිකරු ඒ පිළිබඳ අතෘප්තිය පළ කළේය.

එහි ප්‍රතිඵලයක් ලෙස, ස්වාධීන බාහිර පරීක්ෂණයක් පැවැත්වීමට පාර්ලිමේන්තු කාර්ය මණ්ඩල උපදේශක කමිටුව 2025 ජූලි 25 වැනිදා තීරණය කළේය.

අවසාන වාර්තාව සම්පාදනය කිරීමට පෙර පාර්ලිමේන්තු කාර්ය මණ්ඩල උපදේශක කමිටුව අදාළ සියලු පාර්ශවයන් කැඳවා, පවතින සාක්ෂි පරීක්ෂා කර, සිද්ධියට අදාළ තොරතුරු සමාලෝචනය කළේය.

කථානායකවරයාට ඉදිරිපත් කරන ලද නිගමනවලට අනුව, විමර්ශනයේදී චෝදනාව සනාථ කිරීමට කිසිදු සාක්ෂියක් හමු නොවූ අතර, අදාළ කාන්තාවට කිසිදු ලිංගික අතවරයක් සිදුවී නොමැති බව තීරණය වී තිබේ.

එම අංශය තුළම වෙනත් කිසිදු නිලධාරිනියක් සම්බන්ධ ලිංගික අතවර සිදුවීම් හෝ හඳුනාගෙන නොමැති බව වාර්තාවේ තවදුරටත් සඳහන් විය.