දකුණු චීන මුහුදේ පවතින උණුසුම්කාරී තත්ත්වය තවදුරටත් තීව්‍ර කරමින්, ස්කාබරෝ ෂෝල් දූපත් සමූහය ආශ්‍රිතව අලුතින් ‘ස්වාභාවික රක්ෂිතයක්’ ප්‍රකාශයට පත් කිරීමට චීනය පියවර ගෙන තිබේ.

මෙම නව පාලන නීති හරහා ප්‍රදේශයේ මසුන් ඇල්ලීම සහ පතල් කැපීම පූර්ණ ලෙස තහනම් කර ඇති අතර, පිලිපීන ධීවරයන්ටද එම මුහුදු සීමාවට ඇතුළු වීම අහුරා ඇත.

කෙසේ වෙතත්, ඇමෙරිකා එක්සත් ජනපදය චෝදනා කරන්නේ පරිසර ආරක්ෂණය නමැති සැකකටයුතු ලේබලය අලවා ගනිමින් චීනය උත්සාහ කරන්නේ බලහත්කාරයෙන් අදාළ මුහුදු සීමාවේ බලය තහවුරු කරගැනීමට බවයි.

මෙම සිදුවීම සම්බන්ධයෙන් අදහස් දක්වමින් ඇමෙරිකානු රාජ්‍ය දෙපාර්තමේන්තු ප්‍රකාශක ටොමී පිගොට් සඳහන් කළේ, මෙය අසල්වැසි රටවල අයිතිවාසිකම් උදුරා ගනිමින් චීනය දියත් කරන තවත් එක් ඒකපාර්ශ්වික බලපෑම් කිරීමක් බවයි.

“පරිසර සහ නීතිමය හේතු ව්‍යාජ ලෙස ඉදිරිපත් කරමින්, බලපෑම්කාරී ලෙස දකුණු චීන මුහුදේ තමන්ගේ බලය පතුරුවාලීමට චීනය ගන්නා මෙම උත්සාහය සමස්ත ඉන්දු-පැසිෆික් කලාපයේම ස්ථාවරත්වයට විශාල තර්ජනයක්,” යනුවෙන් ඔහු වැඩිදුරටත් අවධාරණය කළේය.

Xinhua පුවත් සේවයට අනුව චීනය මෙම නව නීති මාලාව ප්‍රකාශයට පත් කළේ පසුගිය ජූලි මාසයේදී දෙරට අතර ඇති වූ දැඩි නොසන්සුන්කාරී තත්ත්වයෙන් පසුවය.

පිලිපීන වෙරළ තීරයේ සිට කිලෝමීටර 245 ක් වැනි ආසන්න දුරකින් පිහිටි මෙම ප්‍රදේශයේ බලය 2012 වසරේ සිට චීනය විසින් අල්ලාගෙන සිටියද, පිලිපීනය තවමත් එම භූමිය සිය අයිතිය ලෙස සලකයි.

ජූලි 24 වන දින ස්කාබරෝ ෂෝල් ආසන්නයේදී පිලිපීන වෙරළාරක්ෂක සහ ධීවර කාර්යාංශයේ නෞකා වෙත චීන වෙරළාරක්ෂක බලකාය විසින් අධි පීඩන ජල ප්‍රහාර එල්ල කළ බවටද පිලිපීනය වාර්තා කර තිබිණි.

චීනයේ මෙම මෑතකාලීන පියවරත් සමඟ දකුණු චීන මුහුදේ කලාපීය ආරක්ෂාව සහ ධීවර අයිතිවාසිකම් පිළිබඳ ගැටලුව නැවත වරක් ජාත්‍යන්තර අවධානයට ලක්ව තිබේ.