September 24, 2026
2019 පාස්කු ඉරිදා සිදු වූ ඛේදනීය ත්රස්ත ප්රහාරය සම්බන්ධයෙන් පසුගියදා දුන් නඩු තීන්දුව සත්යය සහ සාධාරණත්වය සොයා යන දීර්ඝ ගමනේ එක් පියවරක් පමණක් බවත්, ප්රහාරය පිටුපස සිටි සැබෑ කුමන්ත්රණකරුවන් සහ ‘මහමොළකරුවන්’ නීතිය හමුවට පමුණුවන තෙක් කතෝලික සභාව ආරම්භ කළ අරගලය කිසිසේත්ම නතර නොකරන බවත් කොළඹ අගරදගුරු පදවියේ මාධ්ය ප්රකාශක ගරු සිරිල් ගාමිණී ප්රනාන්දු පියතුමා අවධාරණය කරයි. මේ සම්බන්ධයෙන් ‘දිනමිණට’ අදහස් දක්වමින් සිරිල් ගාමිණී පියතුමා සඳහන් කර ඇත්තේ, ජනමාධ්ය විසින් මෙය ‘පාස්කු මහ නඩුව’ ලෙස හැඳින්වුවද, මෙය පාස්කු ප්රහාරයට අදාළව විභාග වන සිය ගණනක් වූ නඩු අතරින් එකක් පමණක් බවයි.
මෙම තීන්දුව මඟින් සහරාන්ගේ අන්තවාදී මතවාදය සහ ඊට ක්ෂේත්ර මට්ටමින් සම්බන්ධ වූ පිරිස පිළිබඳ කරුණු තහවුරු වුවද, ප්රහාරය මෙහෙයවූ දේශපාලන හෝ වෙනත් පසුබිම් කුමන්ත්රණය අනාවරණය වී නොමැති බව පියතුමෝ පෙන්වාදෙති.
ඉදිරි නෛතික සහ විමර්ශනාත්මක ක්රියාමාර්ග පිළිබඳව අදහස් දක්වමින් සිරිල් ගාමිණී පියතුමන් සඳහන් කර ඇත්තේ, සහරාන් ඇතුළු කණ්ඩායම මෙහෙයවූ, ප්රහාරය පිටුපස සිටි සැබෑ ‘මහමොළකරුවන්’ සොයා ගැනීමේ විමර්ශන කෙරෙහි ඉදිරියේදී ප්රධාන අවධානය යොමුකළ යුතු බවයි.
එතුමන්ට අනුව චැනල් 4 අනාවරණ, හමුදා බුද්ධි අංශවල ඇතැම් මැදිහත්වීම් සහ අත්අඩංගුවට ගැනීම් වැළැක්වීම් පිළිබඳව දැනට අපරාධ පරීක්ෂණ දෙපාර්තමේන්තුව (CID) කරන විමර්ශනවල යම් ප්රගතියක් පෙනෙන්නට ඇති බැවින්, එමඟින් සත්යය හෙළිවන තෙක් නීතිමය මැදිහත්වීම අඛණ්ඩව කළ යුතුව තිබේ.
පාස්කු ප්රහාරයට සම්බන්ධ නඩුවක සැකකරුවකු වන හිටපු බුද්ධි අංශ ප්රධානී සුරේෂ් සලේ දීර්ඝ කාලයක් රෝහල්ගතව සිටීම සම්බන්ධයෙන් නීතිපති දෙපාර්තමේන්තුව මතු කළ ‘වෛද්ය කුමන්ත්රණය’ පිළිබඳ සැකය හමුවේ, අධිකරණය නියෝග කර ඇති වෛද්ය වාර්තා හරහා සත්යය එළිදැක්වෙනු ඇතැයි අපේක්ෂා කරන බවද පියතුමෝ අවධාරණය කරති.
අධිකරණ තීන්දු හෝ දඬුවම් පිළිබඳව යම් පාර්ශ්වයකට සෑහීමක් පත්වන්නේ නැත්නම්, සමාජ මාධ්ය හරහා විවේචනය නොකර ඉහළ අධිකරණයකට ඇපෑලක් ඉදිරිපත් කිරීමේ නීතිමය අයිතිය භාවිත කළ යුතුය.
පාස්කු ප්රහාරයේ නඩු ඇතුළුව රටේ ප්රමාද වන සියලුම නඩු කටයුතු කාර්යක්ෂමව විභාග කර වින්දිතයන්ට ඉක්මනින් යුක්තිය ඉටු කිරීම සඳහා නීත්යනුකූලව ගෙන එන ව්යවස්ථාපිත සංශෝධන අනුමත කරන බවද පියතුමෝ අවධාරණය කරති.
අහිංසක ජීවිත 250කට අධික සංඛ්යාවක් බිලිගත් මෙම ඛේදනීය සිදුවීමේ සත්යය හෙළිකර ගැනීම පළිගැනීමක් නොව, නැවත මෙවැනි විනාශයක් රට තුළ සිදුවීම වැළැක්වීමේ එකම මඟ බව පෙන්වාදෙන සිරිල් ගාමිණී පියතුමෝ, සත්යය සහ සාධාරණත්වය උදෙසා කෙරෙන මෙම දීර්ඝ අරගලයේදී ඉවසීමෙන් සහ විශ්වාසයෙන් යුතුව කතෝලික සභාව සමඟ එකතු වී සිටින ලෙස සමස්ත ජනතාවගෙන් සහ වින්දිත පවුල්වලින් ඉල්ලා සිටිති.
