ශ්‍රී ලංකා නීතිඥ සංගමයේ (BASL) වත්මන් නියෝජ්‍ය සභාපති, ජනාධිපති නීතිඥ රියන්සි අර්සකුලරත්න 2027/28 වසර සඳහා එම සංගමයේ සභාපති ධුරයට තරග කිරීමට නියමිත බව වාර්තා වේ. ජ්‍යෙෂ්ඨ සහ කනිෂ්ඨ නීතිඥ සාමාජිකයින් විශාල සංඛ්‍යාවක් කළ ඉල්ලීමකට අනුව ඔහු ඒ සඳහා සිය කැමැත්ත පළ කර තිබේ.

2026/27 වසර සඳහා නිතරඟයෙන් නැවත තේරී පත් වූ වත්මන් සභාපති, නීතිඥ රජීව් අමරසූරියගේ ධුර කාලය 2027 වසරෙන් අවසන් වීමට නියමිතය.

ඒ සඳහා රියන්සි අර්සකුලරත්නට තරග කරන ලෙස ඉල්ලා සිටි සාමාජිකයින් පෙන්වා දෙන්නේ, අධිකරණයේ දෙපාර්ශ්වයම නියෝජනය කරමින් ඔහු ලබා ඇති දීර්ඝ කාලීන අත්දැකීම් සම්භාරයයි. එනම්, වසර තිහකට ආසන්න කාලයක් පැමිණිලි පාර්ශ්වය නියෝජනය කරමින් රජයේ ජ්‍යෙෂ්ඨ නීති නිලධාරියකු ලෙස කටයුතු කිරීම සහ ඉන් පසුව දශක දෙකකට වැඩි කාලයක් පෞද්ගලික නීතිඥවරයකු ලෙස ලබා ඇති පළපුරුද්දයි.

නීතියේ ආධිපත්‍යය, අධිකරණයේ ස්වාධීනත්වය සහ මූලික අයිතිවාසිකම්වලට බලපාන යෝජිත පනත් පිළිබඳව රට තුළ දැඩි අවධානයක් යොමුව ඇති මෙවන් මොහොතක, එක්සත් සහ ස්වාධීන නීතිඥ සංගමයකට විශ්වසනීය නායකත්වයක් දීමට ඔහුගේ මෙම පූර්ණ පළපුරුද්ද මෙන්ම සංගමය තුළ දක්වා ඇති නායකත්වය සහ උසස් වෘත්තීය ප්‍රමිතිය උපකාරී වන බව ඔවුහු පෙන්වා දෙති.

රියන්සි අර්සකුලරත්න සිය වෘත්තීය ජීවිතය ආරම්භ කළේ නීතිපති දෙපාර්තමේන්තුවෙන් වන අතර, එහිදී අතිරේක සොලිසිටර් ජෙනරාල්වරයා ලෙසත් අපරාධ අංශයේ ප්‍රධානියා ලෙසත් උසස්වීම් ලැබීය. 1998 දී ඔහු ජනාධිපති නීතිඥවරයකු ලෙස පත් කරනු ලැබීය. එම කාලය තුළ ඔහු අල්ලස් හෝ දූෂණ චෝදනා විමර්ශන කොමිෂන් සභාවේ අධ්‍යක්ෂ ජෙනරාල්වරයා ලෙසද කටයුතු කළේය.

2003 වසරේදී රාජ්‍ය සේවයෙන් විශ්‍රාම ලැබීමෙන් පසු ඔහු අපරාධ නීතිය සහ මහජන නීතිය පිළිබඳ ක්‍රියාකාරීව නීතිඥ වෘත්තියේ යෙදී සිටියි. 2015 සිට 2018 දක්වා කාලය තුළ ඔහු හැටන් නැෂනල් බැංකුවේ (HNB) සභාපතිවරයා ලෙසද කටයුතු කළේය.

2025 වසරේ සිට ශ්‍රී ලංකා නීතිඥ සංගමයේ නියෝජ්‍ය සභාපතිවරයා ලෙස කටයුතු කරන ඔහු, වත්මන් ධුර කාලය තුළ සංගමය ගනු ලැබූ ප්‍රසිද්ධ තීරණ සහ මතවාදයන් සඳහා සමීපව දායක වී ඇත.