2019 පාස්කු ඉරිදා ප්‍රහාරවලට අදාළ විමර්ශනයේ තුන්වැනි සැකකරු ලෙස ත්‍රස්තවාදය වැළැක්වීමේ පනත (PTA) යටතේ රඳවාගෙන ප්‍රශ්න කරනු ලබන විශ්‍රාමික මේජර් ජෙනරාල් සුරේෂ් සලේ නම්කර ඇති බව අපරාධ පරීක්ෂණ දෙපාර්තමේන්තුව (CID) කොළඹ මහේස්ත්‍රාත් අධිකරණයට දන්වා තිබේ.

සිද්ධිය සම්බන්ධයෙන් 2026 පෙබරවාරි 25 වැනි දින සලේ අත්අඩංගුවට ගත් බවත්, විමර්ශනය සඳහා ලබා දී ඇති අවසරය යටතේ ඔහු දැනට දින 90 ක් රඳවාගෙන ප්‍රශ්න කරන බවත් CID අද (මාර්තු 05) කොළඹ මහේස්ත්‍රාත් ඉසුරු නෙත්තිකුමාරට පැවසීය.

මෝසමක් ගොනුකිරීමෙන් CID මේ බව අධිකරණයට දැනුම්දුන්නේය.

ජනමාධ්‍ය වාර්තාවලට අනුව, සලේ සැකකරුවකු ලෙස නම්කිරීමට සාක්ෂි තිබේදැයි මහේස්ත්‍රාත්වරයා විමසූ අතර, මෙතෙක් සිදුකර ඇති පරීක්ෂණවලට අනුව සාක්ෂි අනාවරණය වී ඇති බව CIDය අධිකරණයට දැනුම්දී ඇත.

මෙම සිද්ධිය සම්බන්ධයෙන් නැගෙනහිර පළාත් හිටපු පොලිස් අධිකාරීවරයකු සහ තවත් දෙදෙනකු දැනටමත් සැකකරුවන් ලෙස නම්කර ඇත.

වව්නතිව්හි පොලිස් නිලධාරීන් දෙදෙනෙකු ඝාතනය කිරීම සහ පාස්කු ඉරිදා ප්‍රහාර මාලාවට පෙර සිදු වූ සයින්දමරුදු බෝම්බ පිපිරීමට අදාළ සංවේදී තොරතුරු සම්බන්ධයෙන් විමර්ශනය පවත්වන බව ද රහස් පොලිසිය අධිකරණයට දන්වා සිටියේය.

දැනට සිදුවෙමින් පවතින විමර්ශනයට අදාළ තවත් වාර්තාවක් ද අධිකරණයට ඉදිරිපත් කරන ලදී.