බ්‍රිතාන්‍යයේ BBC ආයතනයට විසින් අසාධාරණ සහ යුක්ති සහගත නොවන අයුරින් සේවා කොන්ත්‍රාත්තුව අවසන් කිරීම සම්බන්ධයෙන් ජනමාධ්‍යවේදී අසාම් අමීන් වෙත වන්දි මුදල් වශයෙන් රුපියල් මිලියන 4.5ක් ගෙවන ලෙස එම ආයතනයට නියම කර ඇතැයි වාර්තා වේ.

ජනමාධ්‍යවේදී අසාම් අමීන්ගේ කොන්ත්‍රාත්තුව අකාලයේ අවසන් කිරීම ‘අසාධාරණ සහ යුක්ති සහගත නොවන’ බව කම්කරු විනිශ්චය සභාව මීට පෙර තීන්දු කර තිබිණි.

2024 අප්‍රේල් 30 වැනි දින ලිඛිත නියෝගයට අනුව, කම්කරු විනිශ්චය සභාව BBCයේ නියෝජිත ඉයන් හැඩෝගේ ක්‍රියාව අත්තනෝමතික බව තීරණය කර තිබේ.

BBCයට එරෙහිව තීන්දුවක් දෙමින් කම්කරු විනිශ්චය සභාව බ්‍රිතාන්‍ය ජනමාධ්‍ය ආයතනයට නියෝග කර ඇත්තේ ජනමාධ්‍යවේදී අසාම් අමීන්ට රුපියල් මිලියන 4.5ක වන්දියක් ගෙවන ලෙසයි.

දේශපාලකයකු සහ නළුවකු වන රන්ජන් රාමනායක සමඟ පැවැත්වූ දුරකථන ඇමතුමකට අදාළ විකෘති වූ හඬපටයක් සම්බන්ධයෙන් බීබීසීයේ කොන්ත්‍රාත්තුව අවසන් කිරීමට බීබීසීය ගත් තීරණය හේතුවෙන් අසාම් අමීන් ගොනුකළ නඩුවට අදාළව මෙම තීන්දුව ලබා දී ඇත.

අවංකභාවය සහ ස්වාධීනත්වය ප්‍රශ්න කරමින් ‘සිංහලේ ව්‍යාපාරය’ සහ වියත්මග සංවිධානය විසින් කරන ලද මාධ්‍ය ප්‍රකාශ මත පදනම්ව අසාම් අමීන්ගේ කොන්ත්‍රාත්තුව අවසන් කිරීමට BBCය කටයුතු කර තිබිණි.

ශ්‍රී ලංකාවේ ජනමාධ්‍යවේදී අසාම් අමීන්ගේ නීතීඥයන් කම්කරු විනිශ්චය සභාවේදී තර්ක කළේ ඔහුගේ කොන්ත්‍රාත්තුව නියමිත කාලයට පෙර අවසන් කිරීමට BBCය ගත් තීරණය සාධාරණ නොවන බවයි.

එම නියෝගය ලබාදෙමින් කම්කරු විනිශ්චය සභාවේ සභාපතිනී අලංකා ඩී. ඇන්තනී ප්‍රකාශ කර ඇත්තේ, ජනමාධ්‍යවේදියා BBCය යටතේ පසුගිය වසර දහයක කාලය තුළ නොකැළැල් සේවා වාර්තාවක් ඇති බවට විනිශ්චය සභාව හමුවේ ඉදිරිපත් කර ඇති සාක්ෂිවලින් පෙනීයන බවයි.

චෝදනා එල්ල වී ඇති විෂමාචාරයට හේතුව පෙන්වීමට අවස්ථාවක් ලබානොදී ඔහු සේවයෙන් පහකර ඇති බව ද හෙළිවී තිබේ.

ජනමාධ්‍යවේදියා ඉලක්ක කර ඔහුගේ කොන්ත්‍රාත්තුව අවසන් කර ඇත්තේ, ප්‍රධාන වශයෙන්ම 2019 පාස්කු ප්‍රහාරය සහ ඉන් අනතුරුව පැවැති ජනාධිපතිවරණය සම්බන්ධයෙන් BBC මාධ්‍ය වාර්තා කිහිපයක් සම්බන්ධයෙන් මුහුණදුන් පසුබෑම හේතුවෙන් බව අසාම්ගේ නීතිඥයා කම්කරු විනිශ්චය සභාවට වැඩිදුරටත් දැනුම්දී ඇත.

මෙම වකවානුවේ මෙම ලිපි සහ ඇතැම් බීබීසී වර්ල්ඩ් ප්‍රවෘත්ති ආවරණය මහජනතාවගේ අවධානයට ලක්ව ඇති බව අධිකරණයට දන්වමින් ජනමාධ්‍යවේදියාගේ නීතීඥයන් පෙන්වාදී ඇත්තේ, එම ලිපිවලට අසාම් අමීන්ගේ කිසිදු සම්බන්ධයක් හෝ කිසිදු දායකත්වයක් නොමැති බවයි.

සාක්ෂි ලබාදෙමින්, BBCහි නියෝජිත ඉයන් හැඩෝ ද, පසුබෑමට ලක් වූ සහ මහජනතාවගෙන් ප්‍රශ්න කරන ලද ප්‍රවෘත්ති ලිපිවලට අසාම් අමීන්ට කිසිදු සම්බන්ධයක් නොමැති බව පිළිගෙන ඇති අතර, එම ලිපි BBC ලන්ඩන් නියෝජිතයන් විසින් රචනා කර ඇති බව ද හෙළිකර ඇත.

අසාම් අමීන් වෙනුවෙන් ජනාධිපති නීතිඥ ජගත් වික්‍රමනායක, නීතිඥ මිගාර ඩොස් සහ හර්ෂණ එම්. ද සිල්වා පෙනීසිටියහ.