වෙසක් උත්සවය නිමිත්තෙන් ඉන්ධන සහ විදුලිය භාවිතය සම්බන්ධයෙන් කලින් පනවා තිබූ රෙගුලාසි ඉවත් කිරීමට රජය තීරණය කර ඇති බව අග්‍රාමාත්‍ය කාර්යාලය පවසයි.

‘බුද්ධ රශ්මි වෙසක් කලාපය’ පිළිබඳ අවසන් සම්බන්ධීකරණ රැස්වීම අග්‍රාමාත්‍ය ලේකම් ප්‍රදීප් සපුතන්ත්‍රිගේ ප්‍රධානත්වයෙන් අරලියගහ මන්දිරයේදී පැවැත්විණි.

සාකච්ඡාවේදී ප්‍රධාන වශයෙන් අවධානය යොමු කර ඇත්තේ බුද්ධ රශ්මි වෙසක් කලාපයේ විධිවිධාන සහ වෙසක් සැමරුම් කාලය තුළ බලශක්ති පරිභෝජනය කළමනාකරණය කිරීම කෙරෙහිය.

රැස්වීම අතරතුර, වෙසක් උත්සවය නිමිත්තෙන් ඉන්ධන සහ විදුලිය භාවිතය සම්බන්ධයෙන් කලින් පනවා තිබූ රෙගුලාසි ඉවත් කිරීමට රජය ගත් තීරණය පිළිබඳ සහභාගී වූ පිරිසට දැනුම්දුන් බව අග්‍රාමාත්‍ය කාර්යාලය සඳහන් කළේය.

රැස්වීම අතරතුර, ගංගාරාම විහාරාධිපති ආචාර්ය පූජ්‍ය කිරින්දේ අස්සජි හිමියන් ප්‍රකාශ කළේ පවතින අර්බුදයෙන් පසුව, මෙම වසරේ ඉන්ධන සහ විදුලිය පෙර වසරවලට වඩා අරපිරිමැස්මෙන් භාවිත කිරීමට තීරණය කර ඇති බවත්, බුද්ධ රශ්මි වෙසක් කලාපය තුළ අවම ඉන්ධන සහ විදුලි වියදමකින් වෙසක් ජීවගුණය ආලෝකවත් කිරීමට කටයුතු යොදා ඇති බවත්, ආමිස පූජාව හරහා බැතිමතුන් සඳහා ආධ්‍යාත්මික වශයෙන් උසස් වාතාවරණයක් නිර්මාණය කරමින් ප්‍රතිපත්ති පූජාවට ප්‍රමුඛත්වය ලබා දෙන බවත්ය.

මෙම වසරේ වෙසක් කලාපය දිනපතා රාත්‍රී 7.00 සිට අලුයම 12.30 දක්වා විවෘතව පවතින බව කිරින්දේ අස්සජි හිමියෝ වැඩිදුරටත් ප්‍රකාශ කළහ.