ලංකාව නූතන ලෝකයට එක් කළ විවෘත ආර්ථිකය පදනම් කර ගනිමින් එක්සත් ජාතික පක්ෂයට සහ හිටපු ජනාධිපති ජේ ආර් ජයවර්ධන හට දෝෂාරෝපණ කොතෙකුත් එල්ල කළ ද වසර 45 ක් ගතවූ පසුව ද ශ්‍රී ලංකාව තවමත් සිටින්නේ එම රාමුව තුළ බව එක්සත් ජාතික පක්ෂයේ හිටපු නියෝජ්‍ය නායක පාර්ලිමේන්තු මන්ත්‍රී රවී කරුණානායක පවසයි.

ජනමාධ්‍ය හමුවේ අදහස් දක්වමින් මන්ත්‍රීවරයා පැවසුවේ රජයක් සිදු කළ යුත්තේ ප්‍රතිපත්ති ඇති කිරීම මිස ව්‍යාපාර ගෙන යාම නොවන බව ඉකුත් දා අමාත්‍ය සුනිල් හඳුන්නෙත්ති පවසා තිබූ බවයි.

ඒ බව මීට පෙර එක්සත් ජාතික පක්ෂය විසින් ඉදිරිපත් කරන විට ඔවුන් දොස් පැවරූ බව ද මන්ත්‍රීවරයා පෙන්වා දුන්නේය.

එමෙන්ම ඔහු පැවසුවේ ඔහු විසින්ම වර්තමානයේදී එවැනි ප්‍රකාශයක් සිදු කිරීම පිළිබඳ තමන් සතුටට පත්වන බවයි.