හිටපු අමාත්‍ය රාජිත සේනාරත්න විසින් තමාට ඇප ලබාදීම ප්‍රතික්ෂේප කරමින් කොළඹ මහේස්ත්‍රාත් අධිකරණය දුන් නියෝගය සංශෝධනය කරන ලෙස ඉල්ලා ගොනුකළ පෙත්සම ජූලි 30 වන දින සලකා බැලීමට කොළඹ මහාධිකරණය නියෝග කර තිබේ.

මෙම පෙත්සම අද (23) කොළඹ මහාධිකරණ විනිසුරු ඉන්ද්‍රිකා කාලිංගවංශ ඉදිරියේ කැඳවන ලදී.

ඇප ප්‍රතික්ෂේප කරමින් අදාළ මහේස්ත්‍රාත් අධිකරණය දුන් තීන්දුවේ පිටපතක් මහාධිකරණයට ඉදිරිපත් කර නොමැති බැවින් පෙත්සම සම්බන්ධයෙන් නියෝගයක් නිකුත් කිරීමට තමාට නොහැකි බව මහාධිකරණ විනිසුරුවරිය නිරීක්ෂණය කළාය.

ඒ අනුව, පෙත්සමට අදාළ කරුණු ඉදිරිපත් කිරීමට පෙර අදාළ නියෝගය ඉදිරිපත් කරන ලෙස විනිසුරුවරිය රාජිත සේනාරත්න වෙනුවෙන් පෙනීසිටි ජනාධිපති නීතිඥ මෛත්‍රී ගුණරත්නට උපදෙස් දුන්නාය.

ඉන් පසු, පෙත්සම තවදුරටත් සලකා බැලීම ජූලි 30 වැනි දින දක්වා කල්තබන ලදී.