පිළිකා රෝගය සඳහා ප්‍රතිකාර ලැබීමෙන් අනතුරුව බ්‍රිතාන්‍යයේ වේල්ස්හි කුමරිය වන කේට් කුමරිය සිය දැවැන්තම විදෙස් සංචාරය ආරම්භ කරමින්, සිය සැමියා වන විලියම් කුමරුගේ වාර්ෂික අර්ත්ෂොට් ත්‍යාග ප්‍රදානෝත්සවයට සහභාගී වීම සඳහා මේ සතියේ ඉන්දියාව බලා පිටත්ව යාමට නියමිතය.

බ්‍රිතාන්‍ය රජ කිරුළේ මීළඟ උරුමකරු වන 44 හැවිරිදි විලියම් කුමරු සහ කේට් කුමරිය තෙදින නිල සංචාරයක් සඳහා ඉන්දියාවට පැමිණෙන අතර, අඟහරුවාදා පැවැත්වෙන ත්‍යාග ප්‍රදානෝත්සවය ඇතුළුව මුම්බායි නගරය පුරා පැවැත්වෙන වැඩසටහන් මාලාවකට ඔවුහු සහභාගී වෙති.

2024 වසරේදී පිළිකා රෝගී තත්ත්වයක් වෙනුවෙන් රසායනික චිකිත්සක ප්‍රතිකාර ලැබීමෙන් පසු 44 හැවිරිදි කේට් කුමරිය සහභාගී වන ඉහළම පෙළේ විදෙස් සංචාරය මෙයයි. මේ වන විට ඇය රෝගයෙන් සුවය ලබමින් සිටියද, එම රෝගී තත්ත්වය තවමත් සිය ජීවිතයට බලපෑම් එල්ල කරන බව ඇය පවසා තිබේ.

සිය පියා වන තුන්

වැනි චාල්ස් රජු මෙන්ම පරිසර සංරක්ෂණය සිය ප්‍රධානතම අරමුණක් කරගත් විලියම් කුමරු, දේශගුණික විපර්යාසයන්ට විසඳුම් සෙවීමේ අරමුණින් 2020 වසරේදී ‘අර්ත්ෂොට්’ ත්‍යාගය ආරම්භ කළේය. මේ යටතේ තෝරාගන්නා ජයග්‍රාහකයින් පස්දෙනෙකුට ඔවුන්ගේ පාරිසරික ව්‍යාපෘති තවදුරටත් පුළුල් කර ගැනීම සඳහා පවුම් මිලියනය බැගින් (ඇමරිකානු ඩොලර් මිලියන 1.3ක්) පිරිනැමේ.

“විලියම් කුමරුට අනුව ‘අර්ත්ෂොට්’ වැඩසටහනේ අවසාන අරමුණ වන්නේ අශුභවාදී ආකල්ප වෙනුවට නව හැකියාවන් සහ බලාපොරොත්තු ඇති කිරීමයි,” යනුවෙන් රාජකීය යුවළගේ කාර්යාලය වන කෙන්සිංටන් මාලිගයේ ප්‍රකාශකයෙක් සඳහන් කළේය.

“අපගේ පෘථිවිය මුහුණ දෙන පාරිසරික අභියෝග ඉතා බරපතළ වුවද, ඒවා විසඳීම සඳහා යොදවන නිර්මාණශීලීත්වය, අධිෂ්ඨානය සහ බුද්ධිමත්භාවය ඊට නොදෙවෙනි ලෙස බලවත් බව මෙමගින් පෙන්නුම් කෙරෙනවා,” යැයි එම ප්‍රකාශකයා වැඩිදුරටත් පැවසීය.