ඉරානයට එරෙහිව න්‍යෂ්ටික ප්‍රහාරයක් එල්ල කරන ලෙස ඊශ්‍රායල අග්‍රාමාත්‍ය බෙන්ජමින් නෙතන්යාහු විසින් ඇමෙරිකානු ජනාධිපති ඩොනල්ඩ් ට්‍රම්ප් වෙත දැඩි බලපෑම් එල්ල කරමින් සිටින බව ප්‍රකට ඇමෙරිකානු දේශපාලන විචාරක ටකර් කාල්සන් අනාවරණය කරයි. ඔහු පවසන්නේ මෙවැනි ප්‍රහාරයක් සම්බන්ධයෙන් වන අවසන් තීරණය එළඹෙන නොවැම්බර් 07 වැනිදා වන විට ගැනීමට නියමිත බවයි.

X ගිණුමේ සටහනක් තබමින් කාල්සන් සඳහන් කරන්නේ, ටෙහෙරානය විසින් යළිත් යුරේනියම් සාන්ද්‍රණය කිරීම ආරම්භ කර ඇති බවට ඊශ්‍රායල බුද්ධි අංශ විශ්වාස කරන මධ්‍යම ඉරානයේ පිහිටි Pickax කන්දට න්‍යෂ්ටික ප්‍රහාරයක් එල්ල කිරීම කෙරෙහි ට්‍රම්ප් පරිපාලනයේ අවධානය යොමු වීමට තවත් ඇත්තේ දින කිහිපයක් පමණක් බවයි.

අදාළ න්‍යෂ්ටික මධ්‍යස්ථානය අඩි 300 ක් පමණ ඝන ග්‍රැනයිට් පාෂාණ ස්ථරයකට යටින් පිහිටා ඇති බැවින්, එහි ඇති භූගත උමං මාර්ග විනාශ කිරීම සාම්ප්‍රදායික ඇමෙරිකානු ආයුධ මගින් කළ නොහැක්කක් බව කාල්සන් පෙන්වා දෙයි. මේ හේතුවෙන් නෙතන්යාහු න්‍යෂ්ටික ප්‍රහාරයක් සඳහාම පෙනී සිටින බවත්, “බිබී (නෙතන්යාහු) මේ සම්බන්ධයෙන් සිනමාත්මක ලෙස දිනපතාම ට්‍රම්ප්ට දුරකථනයෙන් කතා කරනවා” යනුවෙන් තොරතුරු දන්නා ප්‍රභවයක් උපුටා දක්වමින් ඔහු පවසයි.

ඊශ්‍රායලයේ පැවැති මැතිවරණ ප්‍රතිඵලවලින් පසු නෙතන්යාහු දැඩි දේශපාලන අර්බුදයකට මුහුණ දී සිටින බවත්, බලයේ රැඳී සිටීමට අවශ්‍ය පාර්ලිමේන්තු බහුතරය ලබාගැනීමේ අරමුණින් ඔහු මෙලෙස ට්‍රම්ප්ගේ මැදිහත්වීම අපේක්ෂා කරන බවත් කාල්සන් චෝදනා කරයි.

එමෙන්ම, ඇමෙරිකානු ආරක්ෂක ලේකම් පීට් හෙග්සෙත් සහ මධ්‍යම විධානයේ අණදෙන නිලධාරී බ්‍රැඩ් කූපර් ඉරානය සමග සාකච්ඡාමය විසඳුමකට එළඹීමට විරුද්ධ වන අතර, යළිත් හමුදාමය ක්‍රියාමාර්ග ගැනීමට පක්ෂපාතී වන බවද ඔහු පවසයි. රාජ්‍ය ලේකම් මාර්කෝ රූබියෝ සහ CIA අධ්‍යක්ෂ ජෝන් රැට්ක්ලිෆ් ද නෙතන්යාහුගේ ස්ථාවරයට සහාය පළ කරන බවත්, දෝහා නුවරදී කෙටුම්පත් කෙරෙමින් පවතින ඉරාන සාම ගිවිසුමට හිටපු ජනාධිපති බරැක් ඔබාමා විරෝධය පළ කර ඇති බවත් කාල්සන් වැඩිදුරටත් අනාවරණය කරයි.

කලාපීය වශයෙන් පවතින විරෝධතාවලට කරුණු දක්වමින් කාල්සන් පවසන්නේ, ඉරානයට එරෙහි ප්‍රහාරය සඳහා එක්සත් අරාබි එමීර් රාජ්‍යයේ සහාය ලබාගැනීමේ අරමුණින් නෙතන්යාහු පසුගිය සැප්තැම්බර් 27 වනදා රහසිගතව අබුඩාබි නුවර සංචාරය කළද, එමීර් රාජ්‍යයේ බලධාරීන් අදාළ යෝජනාව ප්‍රතික්ෂේප කර ඇති බවයි.

තවදුරටත් හමුදාමය උත්සන්න වීමක් සිදු වුවහොත් එය ගල්ෆ් කලාපීය ආර්ථිකයට, ලෝක බලශක්ති සැපයුමට සහ පොහොර වෙළඳපොළට දැඩි ලෙස බලපානු ඇතැයි කාල්සන් අනතුරු අඟවයි. ඉකුත් ඔක්තෝබර් මාසයේදී හෝමුස් සමුද්‍ර සන්ධියේදී තෙල් ප්‍රවාහන නෞකා 11 කට දැඩි හානි සිදු වූ බව මතක් කරදෙන ඔහු, මෙම තත්ත්වය දිගින් දිගටම පැවතුනහොත් ගෝලීය ආර්ථික අර්බුදයක් නිර්මාණය විය හැකි බව ද පවසයි.

මීට අමතරව, පිකැක්ස් කන්දට එල්ල කරන න්‍යෂ්ටික ප්‍රහාරයක් හේතුවෙන් පර්සියානු ගල්ෆ් කලාපය පුරා විකිරණශීලී දූෂණයක් සිදු විය හැකි අතර, එය මිලියන සංඛ්‍යාත ජනතාවකගේ පානීය ජල සැපයුමට දැඩි තර්ජනයක් වන බවද ඔහු පෙන්වා දෙයි. ඇමෙරිකාව විසින් න්‍යෂ්ටික ආයුධ භාවිත කිරීම යනු භයානක පූර්වාදර්ශයක් සැපයීමක් වන අතර, එමගින් රුසියාව, යුක්‍රේනය, ඉන්දියාව, පාකිස්තානය සහ උතුරු කොරියාව ඇතුළත් න්‍යෂ්ටික ගැටුම් උත්සන්න වීමේ අවදානම ඉහළ යන බවද කාල්සන් අවධාරණය කරයි.