August 14, 2025
මන්නාරම ප්රදේශයේ යෝජිත සුළං විදුලි බලාගාරය සහ ඒ සම්බන්ධ මතු වී ඇති ගැටලු පිළිබඳ සාකච්ඡාවක් ජනාධිපති අනුර කුමාර දිසානායක මහතාගේ ප්රධානත්වයෙන් ජනාධිපති කාර්යාලයේදී ඊයේ (13) පස්වරුවේ පැවැත්විණි.
මෙම සාකච්ඡාවේදී රටේ බලශක්ති අවශ්යතාව සහ ආර්ථිකයට ව්යාපෘතියේ වැදගත්කම පිළිබඳව අවධානය යොමුකෙරිණි.
සුළං බලාගාරය හේතුවෙන් ප්රදේශයේ ජනතාවට ඇති වී ඇති ගැටලු පිලිබදව සොයා බලා ඒ සඳහා විසදුම් ලබාදීමට අවශ්ය ව්යුහයක් ඇතිකිරීමටද මෙහිදී තීරණය විය.
එසේම ටෙන්ඩර් කැඳවා කොන්ත්රාත් ප්රදානය කර, මේ වනවිට ආරම්භ කර ඇති මෙගාවොට් 20ක සහ යෝජිත මෙගාවොට් 50 ක සුළං විදුලි බලාගාර දෙකෙහි ඉදිකිරීම් කටයුතු තාවකාලිකව අත්හිටුවීමට ද තීරණය කරන ලදී.
බලශක්තිය යනු ප්රදේශයේ පමණක් නොව රටේ ජාතික සම්පතක් බවත්, විදුලිය ප්රශ්නය ගෘහස්ථ විදුලි බිලට පමණක් නොව රටේ නිෂ්පාදන පිරිවැය, විදෙස් ආයෝජන සහ සමස්ත ආර්ථිකය සමඟ බැඳී පවතින බවත් ජනාධිපතිවරයා විසින් මෙම සාකච්ඡාවේදී පෙන්වාදෙනු ලැබීය.
මෙම ව්යාපෘති මඟින් ජනතාවගේ ජීවන වෘත්තියට, ආර්ථිකයට හා ජීවිතය පවත්වාගෙන යෑම සඳහා වන බලපෑම් සහ ජනතාවගේ ගැටලු පිළිබඳව සාකච්ඡා කිරීමට රජය ඕනෑම අවස්ථාවක සූදානම් බවත් ජනාධිපති අනුර කුමාර දිසානායක අවධාරණය කළේය.
රටේ සියලුම සම්පත් මේ රටේ ජනතාවට අයිති බවත්, බලශක්තිය යනු එක් ප්රදේශයකට සීමාවන දෙයක් නොව සමස්ත රටේම ජනතාවගේ අයිතියක් බවත් ජනාධිපති අනුර කුමාර දිසානායක කියාසිටියේය.
සංවර්ධන ව්යාපෘති තවදුරටත් පමාකිරීමෙන් සිදුවන්නේ රටේ ආර්ථිකය ගොඩ නැගීමට තිබෙන අවස්ථාව මඟ හැරයාම බව පෙන්වාදුන් ජනාධිපතිවරයා, සංවර්ධන ව්යාපෘතිවලට විරෝධතා දැක්වීම නිසා සිදුවන්නේ ආයෝජකයන්ට, කර්මාන්තකරුවන්ට සහන ලබාදීමට ආණ්ඩුවට නොහැකිවීම බවද සඳහන් කළේය.
එමනිසා සංවර්ධන ව්යාපෘතිය ක්රියාත්මක කිරීමේදී සියලු පාර්ශ්ව එකඟතාවයන්ට පැමිණිය යුතු බවත්, සංවර්ධන ව්යාපෘති සිදුකෙරෙන ප්රදේශයේ ජනතාවට සිදුවන බලපෑම සම්බන්ධයෙන් ඕනෑම අවස්ථාවක විසඳුම් ලබාදීමට රජය සූදානම් බවත් ජනාධිපති අනුර කුමාර දිසානායක අවධාරණය කළේය.
මෙහිදී මන්නාරම ප්රදේශය නියෝජනය කරමින් පැමිණි ආගමික නායකයින් ඇතුළු ජනතාව කියාසිටියේ ඉල්මනයිට් ව්යාපෘතිය සහ සුළං බලාගාර ව්යාපෘතිය නිසා පරිසර හානි මෙන්ම ජන ජීවිතයට බලපෑම් එල්ලවන බවය.
ඒ පිළිබඳ අවධානය යොමුකළ ජනාධිපතිවරයා මධ්යම පරිසර අධිකාරියේ ඇගයීම් වාර්තා අනුමැතියකින් තොරව එම ව්යාපෘතිය ඉදිරියට ක්රියාත්මක නොකරන බව අවධාරණය කළේය.
පරිසර වාර්තා සහ නිර්දේශ නිසියාකාරයෙන් ක්රියාත්මක නොකිරීම පිළිබඳවද එම ජනතාව විසින් ජනාධිපති අනුර කුමාර දිසානායක දැනුම්වත් කරන ලදී.(PMD)
