අල්ලස් හෝ දූෂණ චෝදනා විමර්ශන කොමිසම විසින් අද අත්අඩංගුවට ගත් හිටපු සංචාරක හා ගුවන් සේවා අමාත්‍ය ප්‍රසන්න රණතුංග කොළඹ ප්‍රධාන මහේස්ත්‍රාත් අසංග එස්. බෝදරගම විසින් ඇප මත මුදාහරින ලදී.

රුපියල් ලක්ෂයක මුදල් ඇපයක් සහ රුපියල් මිලියන 5 බැගින් වූ ශරීර ඇප දෙකක් මත ප්‍රසන්න රණතුංග මුදාහැරීමට මහේස්ත්‍රාත්වරයා නියෝග කළ අතර, ඔහුට රටින් පිටවීම වළක්වන ගමන් තහනමක් ද පනවන ලදී.

නියෝගය ලබා දීමේදී මහේස්ත්‍රාත්වරයා සඳහන් කළේ සැකකරු දුරකථනයෙන් සාක්ෂිකරුවන්ට බලපෑම් කිරීමට උත්සාහ කළ බවට අල්ලස් කොමිසම වාචිකව ප්‍රකාශ කළද, එවැනි ප්‍රකාශයක් සටහන් කර හෝ අධිකරණයට ඉදිරිපත් කරන ලද නිල වාර්තාවට ඇතුළත් කර නොමැති බවයි.

නඩුව නැවත ජනවාරි 16 වන දින විභාගයට ගැනීමට නියමිතව තිබේ.

අල්ලස් කොමිසමට අනුව, 2021 දී සංචාරක අමාත්‍ය ධුරය දැරූ කාලය තුළ සිදු වූ බව කියන මූල්‍ය අක්‍රමිකතාවක් සම්බන්ධයෙන් ප්‍රසන්න රණතුංග අත්අඩංගුවට ගන්නා ලදී.