වරාය නගර ව්‍යාපෘතිය නිම කිරීමේ දිනය වසර දෙකකින් දීර්ඝ කරන බව කැබිනට් ප්‍රකාශක බන්දුල ගුණවර්ධන පවසයි.

එවක මහ නගර සහ බස්නාහිර සංවර්ධන අමාත්‍යාංශය, නාගරික සංවර්ධන අධිකාරිය සහ CHEC Port City Colombo (Pvt) Ltd 2016 දී ත්‍රෛපාර්ශ්වික ගිවිසුමක් අත්සන් කරන ලද අතර එය 2025 ජුනි 5 වැනි දින ඉලක්ක කර අවසන් කිරීමට නියමිතව තිබිණි.

කෙසේවෙතත්, වසංගතය සහ ව්‍යාපෘති සමාගමේ මූල්‍ය බාධාවන් සහ ණය හිමියන්ට ඇති බැඳීම් සපුරාලීමට ප්‍රමාණවත් ආදායමක් උපයා ගැනීමට නොහැකි වීම හේතුවෙන් ව්‍යාපෘතිය නියමිත වේලාවට නිම කිරීමට නොහැකි වනු ඇතැයි ඇමැතිවරයා සඳහන් කර තිබේ.

එබැවින් ආයෝජන ප්‍රවර්ධන අමාත්‍යාංශය, කොළඹ වරාය නගර ආර්ථික කොමිසම සහ CHEC Port City Colombo (Pvt) Ltd සමාගම අතර පරිපූරක ගිවිසුමක් අත්සන් කිරීමත් සමඟ කොළඹ වරාය නගර සංවර්ධන ව්‍යාපෘතිය ක්‍රියාත්මක කිරීමේ කාලය 2027 ජුනි 5 දක්වා දීර්ඝ කෙරෙන බව ගුණවර්ධන ඇමැතිවරයා වාර්තාකරුවන්ට ඊයේ ප්‍රකාශ කර ඇත.

මෙම මස මුලදී ශ්‍රී ලංකා අපනයන සංවර්ධන මණ්ඩලය CHEC Port City Colombo සමඟ අපනයන ඉලක්ක කරගත් ව්‍යාපාර ආකර්ෂණය කර ගැනීමට සහ පහසුකම් සැලසීමට ද ගිවිසුමක් අත්සන් කළේය.