බටහිර ආසියාවේ උදාවී ඇති දැඩි නොසන්සුන්කාරී වාතාවරණය, අස්ථාවර ගෝලීය සැපයුම් දාමයන් සහ තාක්ෂණික ආධිපත්‍යය සඳහා පවතින දැඩි තරඟකාරිත්වය හමුවේ, ඉන්දියාවේ බලශක්ති අනාගතය සුරක්ෂිත කර ගැනීම, උපායමාර්ගික හවුල්කාරිත්වයන් පුළුල් කිරීම සහ යුරෝපය පුරා පවතින උසස් තාක්ෂණයන් සඳහා ඇති ප්‍රවේශය ගැඹුරු කර ගැනීමේ අරමුණින් අග්‍රාමාත්‍ය නරේන්ද්‍ර මෝදි අද අතිශය වැදගත් රටවල් 05 ක සංචාරයක් ආරම්භ කිරීමට නියමිතව ඇත.

මැයි 15 සිට 20 දක්වා සිදු කෙරෙන මෙම සංචාරය මඟින් එක්සත් අරාබි එමීර් රාජ්‍යය, නෙදර්ලන්තය, ස්වීඩනය, නෝර්වේ සහ ඉතාලිය යන රටවල් ආවරණය කෙරේ.

එය සිදුවන්නේ වෙනස් වන භූදේශපාලනික පෙළගැස්වීම් සහ වර්ධනය වන ආර්ථික අවිනිශ්චිතතාවය හමුවේ නවදිල්ලිය සිය විදේශ ප්‍රතිපත්ති ප්‍රමුඛතා නැවත සකස් කරමින් සිටින වටපිටාවක ය.

එහි පළමු නැවතුම වන අබුඩාබි හිදී බලශක්ති ආරක්ෂාව කෙරෙහි වැඩි අවධානයක් යොමු කෙරෙනු ඇතැයි අපේක්ෂා කරන අතර, එහිදී ඉන්දියාව සහ එක්සත් අරාබි එමීර් රාජ්‍යය උපායමාර්ගික තෙල් සංචිත සහ ද්‍රව පෙට්‍රෝලියම් වායූන් (LPG) සහයෝගීතාවයට අදාළ ගිවිසුම්වලට අත්සන් තැබීමට ඉඩ ඇත.

වෙළඳාම, ආයෝජන, බලශක්තිය, තාක්ෂණය සහ සම්බන්ධතාව යන ක්ෂේත්‍ර පුරා සීඝ්‍රයෙන් වර්ධනය වන ඔවුන්ගේ විස්තීර්ණ උපායමාර්ගික හවුල්කාරිත්වය තවදුරටත් ශක්තිමත් කර ගැනීම සඳහා අග්‍රාමාත්‍ය මෝදි මහතා එක්සත් අරාබි එමීර් රාජ්‍යයේ ජනාධිපති ෂෙයික් මොහොමඩ් බින් සයීඩ් අල් නහියන් සමඟ සාකච්ඡා පවත්වනු ඇතැයි ද වාර්තා වේ.

මෙම යුරෝපීය සබඳතා ව්‍යාප්තිය සිදුවන්නේ, මෙම වසරේ මුල් භාගයේදී ඉන්දියා-යුරෝපා සංගම් නිදහස් වෙළඳ ගිවිසුම් (India-EU Free Trade Agreement) සාකච්ඡා සාර්ථකව නිමාවීමෙන් සහ ඉන්දියා-යුරෝපා සංගම් ආරක්ෂක සහ සුරක්ෂිතතා හවුල්කාරිත්ව (India-EU Security and Defence Partnership) රාමුවට අත්සන් තැබීමෙන් අනතුරුවය.