ගොඩබිම් සහ මුහුදු සීමා පිළිබඳ අයිතිවාසිකම් තීරණය කළ යුත්තේ ඒකපාර්ශ්වික ප්‍රකාශ හෝ සමාජ මාධ්‍ය සටහන් හරහා නොව, ස්ථාපිත ජාත්‍යන්තර නීතිමය ක්‍රියා පටිපාටි සහ ආරවුල් විසඳීමේ යාන්ත්‍රණයන් හරහා බව චීනයට මතක් කර දිය යුතු යැයි පිලිපීන විදේශ අමාත්‍යාංශයේ ප්‍රකාශක රොජෙලියෝ විලානුවෙවා මාධ්‍ය හමුවකදී පැවසීය.

මුළු දකුණු චීන මුහුදේම ස්වෛරීභාවය පිළිබඳ බීජිං පාලනයේ ප්‍රකාශය ප්‍රතික්ෂේප කරන බව සඳහන් කළ පිලිපීනය, මතභේදාත්මක ස්කාර්බරෝ ෂෝල් (Scarborough Shoal) ප්‍රදේශය පිලිපීන භූමියට අයත් නොවන බවට එරට තානාපතිවරයෙකු මීට පෙර පිළිගෙන ඇතැයි චීන තානාපති කාර්යාලය කළ ප්‍රකාශය ද ප්‍රතික්ෂේප කළේය.

ස්කාර්බරෝ ෂෝල් සහ ස්ප්‍රැට්ලි දූපත් සමූහයේ (Spratly archipelago) මැනිලා පාලනය යටතේ පවතින දූපත් සම්බන්ධයෙන් පිලිපීනයට “නොබෙදිය හැකි සහ අවිවාදිත දීර්ඝකාලීන ස්වෛරීභාවයක්” පවතින බව විලානුවෙවා වැඩිදුරටත් අවධාරණය කළේය.

මෙම ප්‍රකාශයන් පිලිපීන නිලධාරීන් සහ මැනිලා නුවර පිහිටි චීන තානාපති කාර්යාලය අතර ඇති වී තිබෙන වාග් සංග්‍රාමයේ නවතම තත්ත්වයයි.

සමස්ත දකුණු චීන මුහුදම තම භූමිය ලෙස චීනය කිසිවිටෙකත් හිමිකම් පවසා නොමැති බව මැනිලා හි චීන තානාපති කාර්යාලය අඟහරුවාදා ප්‍රකාශ කළේය.

“චීනයේ ස්ථාවරය පිලිපීන පාර්ශ්වය විසින් හිතාමතාම විකෘති කිරීම වැඩදායී නොවන අතර එහි කිසිදු පදනමක් නැත,” යැයි තානාපති කාර්යාල ප්‍රකාශක ජි ලින්පෙන්ග් (Ji Lingpeng) සමාජ මාධ්‍ය ඔස්සේ නිකුත් කළ නිවේදනයක සඳහන් විය.

පිලිපීනය සහ චීනය යන දෙපාර්ශ්වයම ස්කාර්බරෝ ෂෝල් (Scarborough Shoal) ප්‍රදේශයට හිමිකම් කියන අතර, චීන වෙරළාරක්ෂක බලකාය නිරන්තරයෙන් එහි රැඳී සිටීම හේතුවෙන් එම ප්‍රදේශය දැනට පවතින්නේ බීජිං පාලනය යටතේය.

කෙසේ වෙතත්, මෙම කොරල් දූපතේ ස්වෛරීභාවය පිළිබඳව මෙතෙක් නිල වශයෙන් තීරණයක් ගෙන නොමැත.