ව්‍යාජ රාජ්‍යතාන්ත්‍රික විදේශගමන් බලපත්‍රයක් ළඟතබා ගැනීමේ වරදට වරදකාරිය වී සිරදඬුවම් නියම වූ හිටපු අමාත්‍ය විමල් වීරවංශගේ බිරිඳ වන ශෂී වීරවංශට එරෙහි නඩුව ලබන ඔක්තෝබර් 12 වැනිදා නැවත කැඳවන ලෙස කොළඹ මහේස්ත්‍රාත් අධිකරණය අද (28) නියෝග කළේය.

මෙම පැමිණිල්ල කොළඹ ප්‍රධාන මහේස්ත්‍රාත් අසංග එස්. බෝදරගම හමුවේ අද කැඳවන ලදී.

ඊට අදාළව, සිරදඬුවම් නියම වී දැනට ඇප මත පසුවන ශෂී වීරවංශ අධිකරණය හමුවේ පෙනීසිටියාය.

එහිදී ඇයට නියම වූ සිරදඬුවම කොළඹ මහාධිකරණය මගින් ස්ථිර කර ඇති බවත්, එම තීන්දුවට එරෙහිව ශ්‍රේෂ්ඨාධිකරණය හමුවේ අභියාචනයක් ගොනුකර ඇති බවත් අධිකරණය හමුවේ කරුණු දක්වන ලදී.

එම අභියාචනයට අදාළ ශ්‍රේෂ්ඨාධිකරණ නඩු සටහන් ඉදිරිපත් කර නොතිබීම හේතුවෙන්, ඒවා ඉදිරිපත් කිරීම සඳහා මහේස්ත්‍රාත්වරයා කල් ලබාදුන්නේය.

ඒ අනුව, අදාළ පැමිණිල්ල ඔක්තෝබර් 12 වැනිදා නැවත කැඳවීමට මහේස්ත්‍රාත්වරයා නියෝග කළේය.