චෝදනා එල්ල වී ඇති එයාර් බස් ගුවන් යානා ගනුදෙනුව සම්බන්ධයෙන් ශ්‍රී ලංකන් ගුවන් සමාගමේ හිටපු අධ්‍යක්ෂ මණ්ඩල සාමාජිකයකු සහ හිටපු අමාත්‍ය චමල් රාජපක්ෂගේ පුත්‍රයෙකු වන ශමින්ද්‍ර රාජපක්ෂ සහ ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේනගේ බිරිඳ වන ප්‍රියංකා නියෝමාලි විජේනායක අත්අඩංගුවට ගැනීම සඳහා විවෘත වරෙන්තු නිකුත් කිරීමට කොළඹ මහේස්ත්‍රාත් අධිකරණය අද (02) නියෝග කළේය.

අල්ලස් හෝ දූෂණ චෝදනා විමර්ශන කොමිෂන් සභාව විසින් ඉදිරිපත් කරන ලද ඉල්ලීමක් සලකා බැලීමෙන් පසු කොළඹ ප්‍රධාන මහේස්ත්‍රාත් අසංග බෝදරගම විසින් මෙම නියෝගය නිකුත් කළේය.

ඒ අනුව, ශ්‍රී ලංකාව පුරා සියලුම ගුවන් තොටුපළවල් වෙත වරෙන්තු බෙදාහරින ලෙස මහේස්ත්‍රාත්වරයා තවදුරටත් නියෝග කළේය.

සැකකරුවන් රටට පැමිණි පසු අත්අඩංගුවට ගන්නා ලෙසත් ඒ අනුව අල්ලස් කොමිසම වෙත දැනුම්දෙන ලෙසත් නිලධාරීන්ට උපදෙස් දී තිබේ.

ආගමන හා විගමන පාලක ජෙනරාල්වරයාට ද මෙම නියෝගය දැනුම් දී ඇත.