ඔන්මැක්ස් ඩී.ටී. ප්‍රයිවට් ලිමිටඩ් නමින් වෙබ් අඩවියක් පවත්වාගෙන යමින් නීතිවිරෝධී ආකාරයේ පිරමීඩ මූල්‍ය වංචා සිදුකිරීම් පිළිබඳ මේ වනවිට පැමිණිලි 20,931ක් අපරාධ පරීක්ෂණ දෙපාර්තමේන්තුවට ලැබී ඇතැයි රජයේ අධිනීතිඥ ඔස්වල්ඩ් ලක්ෂ්මන් පෙරේරා ඊයේ (09දා) කොළඹ ප්‍රධාන මහෙස්ත්‍රාත් අසංග එස්. බෝදරගමට දැනුම්දුන්නේය.

මේ වනවිට අනාවරණය වී ඇති කරුණු අනුව එකී වංචාව රුපියල් බිලියන 11කට වඩා අධික බව අනාවරණය වී ඇතැයි ද රජයේ අධිනීතිඥවරයා අධිකරණයට පැවසීය.

එකී වංචාව සම්බන්ධයෙන් සැකපිට අත්අඩංගුවට ගෙන රක්ෂිත බන්ධනාගාර ගතකර සිටියදී මුදල් ආපසු ගෙවන බවට එකඟවීම නිසා මුදාහළ සැකකරුවන් මුදල් ආපසු ගෙවීම සඳහා යෝජිත සැකැස්මක් ඉදිරිපත් කොට ඇතත් එහි ආපසු ගෙවීමට එකඟවී ඇති මුදල ලෙස සටහන් කර ඇත්තේ රුපියල් බිලියන 2.6ක ප්‍රමාණයක් පමණක් බවත් රජයේ අධිනීතිඥවරයා අධිකරණය හමුවේ කියාසිටියේය.

මෙකී මූල්‍ය වංචාවට සම්බන්ධ බොහෝ පුද්ගලයන් තවමත් නිදැල්ලේ සිටින බව අගතියට පත් පාර්ශ්වය වෙනුවෙන් පෙනීසිටි නීතිඥවරුන් අධිකරණයට පෙන්වාදුන් අතර, ඒ පිළිබඳ පුළුල් විමර්ශනයක් සිදුකර ප්‍රගතිය අධිකරණයට වාර්තා කරන ලෙසට ප්‍රධාන මහෙස්ත්‍රාත්වරයා නියෝග කළේය.