රජයෙන් රජයට ක්‍රමවේදය හරහා අප්‍රේල් සහ මැයි මාස සඳහා ඉන්දියාවෙන් ඉන්ධන සැපයුම් ලබා ගැනීම වෙනුවෙන්, දැනට නියම කරන ලද ටෙන්ඩර් ක්‍රියාපටිපාටි අත්හැරීමට රජය සැලසුම් කරන බව ජ්‍යෙෂ්ඨ අමාත්‍යවරයෙක් උපුටා දක්වමින් The Sunday Times පුවත්පත වාර්තා කරයි.

බටහිර ආසියාවේ පවතින ගැටුම හේතුවෙන් දිනෙන් දින නරක අතට හැරෙන ගෝලීය බලශක්ති අර්බුදය සැළකිල්ලට ගනිමින් මෙම තීරණය ගෙන ඇති බව එම වාර්තාව කියයි.

යුද ගැටුම ගෝලීය ඉන්ධන සැපයුම් දාමයන්ට බාධා කර ඇති බවත් නිෂ්පාදනයට බලපා ඇති බවත් විදේශ කටයුතු අමාත්‍ය විජිත හේරත් පවසා තිබේ.

රජයෙන් රජයට ක්‍රමවේදය හරහා ඉන්ධන මිලදී ගැනීම සඳහා වන යෝජනාව කඩිනමින් කැබිනට් මණ්ඩලයට ඉදිරිපත් කරන බව ද ඔහු සඳහන් කර ඇත.

මෙයින් අදහස් කරන්නේ ටෙන්ඩර් කැඳවීම සහ ලංසු ඇගයීම වැනි ඉන්ධන මිලදී ගැනීම් සිදුකිරීම සඳහා නියම කර ඇති ක්‍රියාපටිපාටිය වෙනස් කිරීම බව වාර්තාවේ සඳහන් වේ.

ඒ අනුව මූලික මිලදී ගැනීම ඉන්දියාවෙන් වනු ඇත.

පසුගිය මාර්තු 6 වැනිදා නවදිල්ලියේ දී ඉන්දීය විදේශ කටයුතු අමාත්‍ය එස්. ජයිශංකර් සමඟ නිල සාකච්ඡා පැවැත්වූ විට අමාත්‍ය හේරත් මේ පිළිබඳ සාකච්ඡා කර ඇති අතර ඔහු ආපසු පැමිණි පසු දුරකථන සංවාදයකින් ද ඒ පිළිබඳ සාකච්ඡා කර තිබේ.

ඉන්දියාව ධනාත්මක ප්‍රතිචාරයක් දැක්වූ බවත්, පසු විපරමක් ලෙස ශ්‍රී ලංකාව අප්‍රේල් සහ මැයි සඳහා ඩීසල්, පෙට්‍රල් සහ දැවි තෙල් සඳහා රටේ අවශ්‍යතා ඉන්දියාවට යොමු කළ බවත් ඔහු සඳහන් කර තිබේ.

ඇස්තමේන්තුගත ප්‍රමාණයන් ලංකා ඛනිජ තෙල් සංස්ථාව (CPC) විසින් සකස් කර ඇත.

මේ අතර, රජය රුසියාව සමඟ ද එවැනිම ගිවිසුමක් ඇතිකර ගැනීම සඳහා ගවේෂණය කරමින් සිටී.

අමාත්‍ය හේරත් සහ රුසියානු තානාපති ලෙවන් එස්. ධගරියන්, නියෝජ්‍ය මුදල් හා සැලසුම් අමාත්‍ය අනිල් ජයන්ත ප්‍රනාන්දු, ලංකා ඛනිජ තෙල් සංස්ථාවේ සභාපති ඩී. ජේ. රාජකරුණා සහ අනෙකුත් නිලධාරීන් අතර හමුවක් පසුගිය බ්‍රහස්පතින්දා පැවැත්විණි.

ශ්‍රී ලංකාවේ ඉල්ලීම වහාම මොස්කව් වෙත දැනුම් දීමට තානාපතිවරයා එකඟ වී තිබිණි.

එතැන් සිට ඔහු රුසියානු බලශක්ති අමාත්‍යවරයා සමඟ සම්බන්ධ වී ඇති අතර, අවශ්‍ය ඉන්ධන තොග සැපයීමට කටයුතු කරන බව පවසා තිබේ.

විසඳිය යුතු එකම කාරණය වන්නේ ගෙවීම් කළ හැක්කේ කුමන මුදල් ඒකකයෙන්ද යන්නයි.

මේ සම්බන්ධයෙන්, රජය මහ බැංකු අධිපති නන්දලාල් වීරසිංහට දැනුම් දී ඇත්තේ මෙම කාරණය සාකච්ඡා කර විසඳා ගන්නා ලෙසයි.

2022 දී යුක්රේන ගැටුමත් සමග බටහිර රටවල් විසින් එහි ඇමරිකානු ඩොලර් සහ යුරෝ ගිණුම් අත්හිටුවීමෙන් පසු රුසියාව විදේශ වෙළඳාමේදී ජාතික මුදල් වෙත මාරු වීමට පටන් ගත්තේය.

සාකච්ඡා ඉදිරියට ගෙන යෑම සඳහා රුසියාවේ ශ්‍රී ලංකා තානාපති ෂෝබිනි ගුණසේකර හෙට රුසියාවේ නියෝජ්‍ය බලශක්ති අමාත්‍යවරයා හමුවනු ඇති බව The Sunday Times පුවත්පත වාර්තා කරයි.