දුරකථන අංකය වෙනත් දුරකථන ජාලයකට මාරුකිරීමට (Number Portability) දුරකථන ක්‍රියාකරුවන්ට බලපත්‍ර ලබාදීම සඳහා නීතිපතිවරයාගේ මතය ලැබෙන තෙක් විදුලි සංදේශ නියාමන කොමිෂන් සභාව බලාසිටින බව වාර්තා වේ.

විදුලි සංදේශ නියාමන කොමිෂන් සභාවේ අධ්‍යක්ෂ ජනරාල් (විශ්‍රාමික) එයාර් වයිස් මාර්ෂල් බන්දුල හේරත් ‘Sunday Times Business’ වෙත පවසා ඇත්තේ, අංක මාරු කිරීමේ සේවාව ක්‍රියාත්මක කරන දිනය සම්බන්ධයෙන් නීතිපතිවරයාගේ මතය අවශ්‍ය බවයි. එමගින් මෙම වැඩසටහනේ නීතිමය වලංගුභාවය, පනත් හා නීතිරීතිවලට අනුකූලතාව සහ ක්‍රියාත්මක කිරීමේ හැකියාව තහවුරු කර ගැනීමට අපේක්ෂා කෙරේ.

අංක මාරුකිරීමේ වැඩසටහන යටතේ තරගකාරී විරෝධී හැසිරීම් සම්බන්ධ රෙගුලාසි, අංක මාරුකිරීම සඳහා ගතවන කාලසීමා සහ වැරදි ලෙස අංක මාරුකිරීම ප්‍රතික්ෂේප කරන අවස්ථාවලදී පනවන මූල්‍ය දිරිගැන්වීම්/අධෛර්ය කිරීම් ඇතුළු වාණිජ, මූල්‍ය සහ මෙහෙයුම් සම්බන්ධ පුළුල් මාර්ගෝපදේශ ක්‍රියාත්මක කිරීමට නියමිතය. මෙම නීතිමය බැඳීම් සහිත රෙගුලාසි ක්‍රියාත්මක කිරීමට පෙර නීතිපති දෙපාර්තමේන්තුව විසින් ඒවා විධිමත් ලෙස පරීක්ෂා කර අනුමත කළ යුතු බවද ඔහු සඳහන් කර තිබේ.

ඔහු වැඩිදුරටත් පවසා ඇත්තේ, ජංගම දුරකථන ක්‍රියාකරුවන් තිදෙනකු සහ ස්ථාවර දුරකථන ක්‍රියාකරුවන් දෙදෙනකු මෙම පහසුකම අපේක්ෂාවෙන් සිටින බවයි. ජංගම දුරකථන අංක මාරුකිරීම (MNP) සහ ස්ථාවර දුරකථන අංක මාරු කිරීම (FNP) එකවර ක්‍රියාත්මක කළ යුතුද, නැතහොත් වෙන වෙනම ක්‍රියාත්මක කළ යුතුද යන්න සම්බන්ධයෙන්ද කොමිෂන් සභාව තීරණයක් අපේක්ෂාවෙන් සිටී.

කර්මාන්ත ක්ෂේත්‍රයේ නිලධාරීන් පවසන්නේ දුරකථන අංක වෙනත් ජාලයකට මාරුකිරීමේදී බාධාවකින් තොරව සේවාව පවත්වාගෙන යාම සඳහා ක්‍රියාකරුවන් තවමත් තාක්ෂණික ඇගයීම්, උපකරණ මිලදී ගැනීම් සහ ඔවුන්ගේ ජාලවල අවශ්‍ය යටිතල පහසුකම් වැඩිදියුණු කිරීම් සිදුකරමින් සිටින බවයි.

ක්‍රියාකරුවන් අතර අන්‍යෝන්‍ය එකඟතාවකට පැමිණීමට නොහැකි වුවහොත්, ශ්‍රී ලංකා විදුලි සංදේශ පනත යටතේ දැඩි නියාමන නියෝගයක් ක්‍රියාත්මක කිරීමට විදුලි සංදේශ නියාමන කොමිෂන් සභාව නීත්‍යානුකූලව සූදානම් බවද කොමිෂන් සභා ආරංචි මාර්ග සඳහන් කරයි.

මේ වන විට ශ්‍රී ලංකාවේ ජංගම දුරකථන ග්‍රාහකයෝ මිලියන 29.5ක් සහ ස්ථාවර දුරකථන ග්‍රාහකයෝ මිලියන 2.7ක් සිටිති.