කොළඹ අක්ෂි රෝහල පෙර නොවූ විරූ තදබදයකට මුහුණ දී සිටින බව වාර්තාවේ.

පැමිණෙන පිරිසගෙන් බහුතරය වන වැඩිහිටි පුරවැසියන්ට වැරදි කළමනාකරණය හේතුවෙන් පීඩාකාරී තත්ත්වයන් යටතේ ප්‍රතිකාර ලබා ගැනීමට සිදුව ඇත.

එහිදී මොණරාගල, වවුනියාව, බදුල්ල සහ තංගල්ල වැනි දුර බැහැර ප්‍රදේශවලින් පැමිණෙන රෝගීන් වැඩි පීඩාවකට පත්ව සිටිති.

වාර්තා වන පරිදි උපදේශන කාමර අසල රැඳී සිටින ස්ථානවල 50 දෙනෙකුට පමණ ආසන ඇති නමුත්, රෝගීන් 150ක් පමණ පැය පහක් දක්වා සිටගෙන දැඩි අපහසුතාවට පත්ව සිටිති.

උපදේශන කාමර සහ කොරිඩෝවලට යාබදව පිහිටා ඇති ඉතා කණගාටුදායක තත්ත්වයේ පවතින වැසිකිළි දැඩි දුර්ගන්ධයක් නිකුත් කරයි.

රෝගීන් හැසිරවීමේදී දැඩි හා යල් පැන ගිය ක්‍රම ක්‍රියාත්මක වන බවත් උපදේශනය සඳහා රෝගීන් කණ්ඩායම් කිරීමට අශිෂ්ට ආකාරයෙන් කෑ ගැසීම සිදු කරන බවත් වාර්තා වේ.

වයස අවුරුදු 65 ට වැඩි වැඩිහිටි රෝගීන්ට පවා උපස්ථායකයන් සහ ආරක්ෂක නිලධාරීන් ඇතුළු සුළු කාර්ය මණ්ඩලය සැර පරුෂ ලෙස අමතන බව ද වාර්තා වේ.

එපමණක් නොව, දිගු වේලාවක් බලා සිටීමට සිදුවීම, සනීපාරක්ෂාව නොමැතිකම සහ අමානුෂික ලෙස සැළකීම පිළිබඳ රෝගීන්ගේ පැමිණිලි රාශියකට ජ්‍යෙෂ්ඨ විශේෂඥ වෛද්‍යවරුන් සහ හෙද කාර්ය මණ්ඩලය නොසැළකිලිමත්කමක් හෝ උදාසීනත්වයක් දක්වන බව පෙනීගොස් ඇත.

ජාතික අක්ෂි රෝහලේ අධ්‍යක්ෂ වෛද්‍ය ජයරුවන් බණ්ඩාර තදබදය බරපතළ ගැටළුවක් බව පිළිගෙන තිබේ.

“අනෙකුත් රෝහල් වගේ නෙවෙයි අපි රෝහලට පැමිණෙන පුද්ගලයන් සංඛ්‍යාව සීමා කරන්නේ නැහැ. ගැටලුව රෝගීන් පමණක් නෙවෙයි, ඔවුන් සමඟ පවුලේ සියලුම සාමාජිකයන් පැමිණීමයි.එය අපට පාලනය කළ නොහැකියි. මේ නිසා තදබදයක් ඇති වෙනවා,” ඔහු පවසා තිබේ.

මේ අතර, කාච හිඟයක් හේතුවෙන් ඇසේ සුද ඉවත් කිරීමේ සැත්කම් නොකර සිටීමට බල කෙරෙන බවට පැතිර යන කටකතා තිබියදීත්, අධ්‍යක්ෂවරයා කාච හිඟයක් ඇති බව ප්‍රතික්ෂේප කළේය.