දේශපාලනයෙන් විශ්‍රාම ගැනීමට සුදානම් නමුත් සිය ආධාරකරුවන් නිසා එම තීරණය ගැනීම අපහසු බව හිටපු ඇමැති නිමල් සිරිපාල ද සිල්වා පවසයි.

ජනමාධ්‍ය වෙත අදහස් දක්වමින් ඔහු සඳහන් කළේ, තමන් විශ්‍රාම යෑමට කැමැත්තෙන් සිටියද වසර 35ක දේශපාලන දිවිය පුරාවට තමන් සමඟ සිටි අය කෙරෙහි වගකීමක් දැනෙන බවයි.

තම දේශපාලන සගයන් සහ ආධාරකරුවන් අතහැර දැමීම දුෂ්කර තීරණයක් වනු ඇතැයි ඔහු පැවසීය.

“මට ඉවත් වීමට ප්‍රශ්නයක් නැහැ. නමුත් අවුරුදු 35ක් මේ අය එක්ක දේශපාලනය කරලා මට ඒ අයව දාලා යන්න බැහැ. මට තියෙන එකම ප්‍රශ්නය මට එයාලව දාලා යන්න පුළුවන්ද නැද්ද කියන එක විතරයි. ඒ නිසා එය දිනීම හෝ පැරදීම ගැන නොවේ, ”ඔහු පැවසීය.

විවිධ පාර්ශ්වවල අදහස් විමසීමෙන් අනතුරුව තමන් නැවත තරග කළ යුතු බවට එකඟතාව පළ වූ බවද ඔහු වැඩිදුරටත් අනාවරණය කළේය.