ආන්දෝලනාත්මක ‘ක්‍රිෂ්’ (Krrish) ගනුදෙනුවට අදාළව රක්ෂිත බන්ධනාගාරගත කර සිටි ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ ඇප මත මුදාහැරීමට කොළඹ මහේස්ත්‍රාත් අධිකරණය නියෝග කර ඇත.

පසුගිය නඩු වාරයේදී නාමල් රාජපක්ෂ වෙනුවෙන් පෙනීසිටි නීතිඥයන් ඇප ඉල්ලුම්පත්‍රයක් ඉදිරිපත් කරමින්, ඔහුගේ දෙමාපියන් දෙදෙනාගේම පවතින බරපතල සෞඛ්‍ය තත්ත්වය ඇප ලබාදීම සඳහා වූ විශේෂ කරුණක් ලෙස පෙන්වා දී තිබිණි.

කෙසේවෙතත්, අල්ලස් හෝ දූෂණ චෝදනා විමර්ශන කොමිෂන් සභාව එම ඇප ඉල්ලීමට විරුද්ධත්වය පළකර තිබිණි.

දෙපාර්ශ්වය විසින් ඉදිරිපත් කළ කරුණු සලකා බැලීමෙන් අනතුරුව, කොළඹ ප්‍රධාන මහේස්ත්‍රාත් අසංග එස්. බෝදරගම අද දින මෙම ඇප නියෝගය ප්‍රකාශයට පත්කළේය.

කොළඹ ට්‍රාන්ස්වර්ක්ස් චතුරස්‍රයේ පිහිටි ඉඩම් කොටසක් බහුකාර්ය සංවර්ධන ව්‍යාපෘතියක් සඳහා ඉන්දියානු ‘ක්‍රිෂ්’ සමාගම වෙත පැවරීමට පහසුකම් සැලසීම වෙනුවෙන් රුපියල් මිලියන 70 ක අල්ලස් මුදලක් ලබාගත් බවට එල්ල වූ චෝදනා මත, නාමල් රාජපක්ෂ සැප්තැම්බර් 04 වන දින අල්ලස් කොමිසම මගින් අත්අඩංගුවට ගෙන අධිකරණයට ඉදිරිපත් කිරීමෙන් පසුව මෙලෙස රක්ෂිත බන්ධනාගාරගත කර සිටියේය.