ගෑස් තොග සඟවා තබා ගනිමින් පාරිභෝගිකයන්ට ඒවා විකිණීම ප්‍රතික්ෂේප කළ මහනුවර කොටුගොඩැල්ල වීදියේ පිහිටි බලයලත් ලිට්‍රෝ ගෑස් අලෙවිසැලක වෙළෙන්දකුට මහනුවර මහේස්ත්‍රාත් අධිකරණය විසින් දඩ නියම කර තිබේ.

පාරිභෝගික කටයුතු අධිකාරියේ නිලධාරීන් විසින් සිදු කරන ලද වැටළීමකදී අනාවරණ වූ මෙම ජාවාරමට අදාළව, එම වෙළෙඳසැලේ තිබී සොයාගත් කිලෝග්‍රෑම් 12.5 දරන ලිට්‍රෝ ගෑස් සිලින්ඩර 28 ක් රජය සතු කිරීමටද අධිකරණය නියෝග කර ඇත.

අදාළ වෙළෙඳසැල වන D.D. Gurusinghe Trading ආයතනයෙන් ගෑස් මිලදී ගැනීමට පැමිණෙන පාරිභෝගිකයන්ට ගෑස් නොමැති බව පවසමින් ඒවා අලෙවි කිරීම ප්‍රතික්ෂේප කරන බවට පාරිභෝගික කටයුතු අධිකාරියට ලැබුණු තොරතුරු සහ පැමිණිලි කිහිපයක් මත මෙම වැටළීම ක්‍රියාත්මක කර තිබේ.

මෙම මෙහෙයුමේදී, පාරිභෝගික කටයුතු අධිකාරියේ විමර්ශන නිලධාරියකු සාමාන්‍ය පාරිභෝගිකයකු ලෙස වෙළෙඳසැල වෙත ගොස් කිලෝග්‍රෑම් 12.5 ක ගෑස් සිලින්ඩරයක් ඉල්ලා සිටි අවස්ථාවේදීද වෙළෙන්දා පවසා ඇත්තේ ගෑස් තොග නොමැති බවයි. කෙසේ වෙතත්, වහාම ක්‍රියාත්මක වූ නිලධාරීන් එම පරිශ්‍රය පරීක්ෂා කිරීමේදී විකිණීමට සූදානම් කර තිබූ ලිට්‍රෝ ගෑස් සිලින්ඩර 28 ක තොගයක් එහි සඟවා තිබී සොයා ගැනීමට සමත් විය.

ඒ අනුව, අදාළ භාණ්ඩ තොගය අත්අඩංගුවට ගත් නිලධාරීන්, වෙළෙන්දාට එරෙහිව මහනුවර මහේස්ත්‍රාත් අධිකරණය හමුවේ නඩු පවරන ලදී.

2003 අංක 9 දරන පාරිභෝගික කටයුතු අධිකාරි පනතේ 16(අ) වගන්තිය යටතේ, විකිණීම සඳහා භාණ්ඩ තොග තිබියදී ඒවා නොමැති බවට අසත්‍ය ප්‍රකාශ කිරීම හෝ පාරිභෝගිකයන් නොමඟ යැවීම දැඩි ලෙස නීති විරෝධී වේ.

භාණ්ඩ සඟවා තබා ගැනීම සහ මෙවැනි අසාධාරණ වෙළෙඳ පිළිවෙත්වලට එරෙහිව දිවයින පුරා වැටළීම් අඛණ්ඩව ක්‍රියාත්මක කරන බව පාරිභෝගික කටයුතු අධිකාරිය අවධාරණය කරයි. මෙවැනි නීති විරෝධී වෙළෙඳ කටයුතු පිළිබඳව තොරතුරු වෙතොත්, කාර්යාල වේලාවන් තුළ පාරිභෝගික කටයුතු අධිකාරියේ 1977 උණුසුම් ඇමතුම් අංකය වෙත වහාම දැනුම් දෙන ලෙස මහජනතාවගෙන් ඉල්ලා සිටී.