May 28, 2023
පාස්කු ඉරිදා ත්‍රස්ත ප්‍රහාරය පිටුපස පුළුල් කුමන්ත්‍රණයක් ක්‍රියාත්මක වූ බවට හිටපු නීතිපති දප්පුල ද ලිවේරා විසින් කරන ලද චෝදනා විමර්ශනය කිරීම සඳහා පාර්ලිමේන්තු තේරීම් කාරක සභාවක් පත්කරන ලෙස ඉල්ලා ආණ්ඩු පක්ෂයේ මන්ත්‍රීවරුන් 21 දෙනකු කථානායක මහින්ද යාපා අබේවර්ධන වෙත ලිපියක් භාර දී තිබේ.
නීතිපතිවරයා විශ්‍රාම යෑමට දින කිහිපයකට පෙර, 2021 මැයි 17 වැනි දින පෞද්ගලික රූපවාහිනී නාලිකාවකට ලබා දුන් සම්මුඛ සාකච්ඡාවකදී ප්‍රකාශ කරන ලද්දේ මෙම ප්‍රහාරය පිටුපස විශාල කුමන්ත්‍රණයක් තිබූ බවයි.
නවුෆර් මවුලවි නමැත්තා මෙම කුමන්ත්‍රණයේ ප්‍රධාන කොටස්කරුවා සහ කුමන්ත්‍රණකරුවන්ගේ නායකයා ලෙස කටයුතු කරද්දී, ඔහු මහ මොළකරු බව නිශ්චිතව කිව නොහැකි බව එවකට නීතිපතිවරයා ප්‍රකාශ කළ බව මන්ත්‍රීවරු සිය ලිපියෙන් පෙන්වාදෙති.
මරාගෙන මැරෙන බෝම්බ ප්‍රහාර එල්ල කිරීමට තීරණය කර තිබුණද, සහරාන් හෂීම් එම කුමන්ත්‍රණයට සම්බන්ධ වූ එක් අයෙක් පමණක් බවද හිටපු නීතිපතිවරයා ද පවසා තිබිණි.
නීතිපතිවරයා වශයෙන් ද දප්පුල ද ලිවේරාට ප්‍රහාරයන්ට සම්බන්ධ සියලුම විමර්ශන ලිපිගොනු, සාක්ෂි සහ අනෙකුත් තොරතුරු වෙත සෘජු ප්‍රවේශය පැවැතිණි.
ඒ අනුව, මන්ත්‍රීවරුන් පවසන්නේ ප්‍රහාරයන් පිළිබඳව මෙතෙක් හෙළි නොකළ තොරතුරු සම්බන්ධයෙන් ඔහු යමක් දන්නා බවට විශ්වාස කිරීමට සාධාරණ හේතු ඇති බවයි.
එමනිසා හිටපු නීතිපතිවරයාගේ ප්‍රකාශ පිළිබඳව සොයා බලා පාර්ලිමේන්තුවට වාර්තා කිරීම සඳහා මන්ත්‍රීවරුන් 15 දෙනකුගෙන් යුත් තේරීම් කාරක සභාව පත් කළ යුතු බවට මන්ත්‍රීවරුන් යෝජනා කර තිබේ.
