මොරොක්කෝව සහ ඉන්දියාව අතර පවතින සබඳතා 14 වන සියවස තරම් අතීතයකට දිව යන්නකි. ඒ ප්‍රකට මොරොක්කෝ සංචාරක ඉබන් බතුතා ඉන්දියාවට පැමිණ වසර ගණනාවක් එහි ජීවත් වූ සමයටයි. මධ්‍යකාලීන ඉන්දීය සමාජය පිළිබඳව ඔහු තැබූ සටහන් ඉන්දියානු ඉතිහාසය හඳුනාගැනීමේ වැදගත් මූලාශ්‍රයක් ලෙස අදටත් සැලකේ. ඇතැම් ඉතිහාසඥයින්ට අනුව, 12 වන සියවසේදී මාලදිවයින් වැසියන්ට ඉස්ලාම් දහම හඳුන්වා දුන් මොරොක්කෝ ජාතික අබූ අල්-බරකත් යුසුෆ් අල්-බර්බාරීගේ සමය දක්වා මෙම සබඳතාවයේ අතීතය දිව යයි.

1956 ජූනි 20 වන දින ඉන්දියාව විසින් මොරොක්කෝවේ නිදහස නිල වශයෙන් පිළිගත් අතර, 1957 දී දෙරට අතර රාජ්‍යතන්ත්‍රික සබඳතා ආරම්භ විය. එතැන් පටන් ගතවූ කාලය පුරාවටම දෙරට අතර මිත්‍රත්වය නිරන්තර වර්ධනයක් පෙන්නුම් කළේය.

මොරොක්කෝවේ රාජ්‍යත්වයට පත්වීමෙන් අනතුරුව හයවන මොහමඩ් රජු සිය ප්‍රථම ආසියානු සංචාරය සඳහා 2001 වසරේදී තෝරාගත්තේ ඉන්දියාවයි. එම රාජකීය සංචාරය දෙරට අතර සබඳතා ශක්තිමත් කිරීමේ නව වැඩපිළිවෙලකට මඟපෑදීය. අනතුරුව 2016 ඔක්තෝබර් මාසයේදී පැවැති 3 වන ඉන්දියා-අප්‍රිකා සමුළුවට (IAFS-III) සහභාගී වෙමින් රජු සිදුකළ දෙවන රාජකීය සංචාරයේදී, නව දිල්ලියේදී විශේෂ රාජකීය දේශනයක් පැවැත්වූ අතර ඉන්දීය අග්‍රාමාත්‍ය නරේන්ද්‍ර මෝදි හමුවී සාකච්ඡා පවත්වන ලදී.

2015 වසරේදී මොරොක්කෝ රජතුමන් ඉන්දියාවේ නිරත වූ එම ඓතිහාසික සංචාරය සහ අග්‍රාමාත්‍ය නරේන්ද්‍ර මෝදි සමඟ පැවැත්වූ අමතක නොවන හමුව දෙරට අතර ද්වීපාර්ශ්වික සබඳතාවලට නව මාවතක් විවර කළේය. එතැන් සිට දෙරට අතර සබඳතාව ‘මූලෝපායික හවුල්කාරිත්වයක’ මට්ටම දක්වා ඉහළ නැංවීමට නායකයින් දෙපළ තීරණය කළහ.

තවද, 2018 වසරේදී මොරොක්කෝ රජු විසින් ඉන්දීය අග්‍රාමාත්‍යවරයා වෙත යොමු කරන ලද ලිපිය මගින් බුද්ධි තොරතුරු හුවමාරුව, අභ්‍යවකාශ ක්ෂේත්‍රය සහ සයිබර් අපරාධ මර්දනය වැනි නව සහයෝගිතා ක්ෂේත්‍ර ගණනාවක් හඳුන්වා දෙන ලදී. එය මොරොක්කෝ-ඉන්දීය සබඳතා ඉදිරියටත් තවදුරටත් වර්ධනය කිරීම සඳහා වන සැබෑ මාර්ග සිතියමක් ලෙස ක්‍රියා කරයි.