සිවිල් යුද්ධයේදී රටින් පලා යෑමට බල කෙරුණු සහ දැන් තමිල්නාඩුවේ සරණාගතයන් ලෙස ජීවත් වන සියලු දෙනා පිළිගැනීමට සහ සහාය දීමට ශ්‍රී ලංකාව සූදානම් බව අමාත්‍ය බිමල් රත්නායක ඉන්දීය මාධ්‍ය වෙත අදහස් දක්වමින් පැවසීය.

පුවත් වාර්තාවට අනුව, සරණාගතයන් ‘දේශපාලන ප්‍රචාරණය සඳහා මෙවලමක්’ ලෙස භාවිත කිරීමෙන් වළකින ලෙස අමාත්‍ය රත්නායක ඉන්දීය සහ තමිල්නාඩු රජයන්ගෙන් ඉල්ලා සිටී.

දශක හතරකට වැඩි කාලයක් ඉන්දියාවේ ජීවත් වන ශ්‍රී ලාංකික දෙමළ ජනතාව සම්බන්ධ ගැටළු සම්බන්ධයෙන් මධ්‍යම රජයේ මැදිහත්වීමක් ඉල්ලා තමිල්නාඩු ප්‍රධාන අමාත්‍ය එම්.කේ. ස්ටාලින් විසින් අගමැති මෝදි වෙත යවන ලද 2026 පෙබරවාරි 15 ​​දිනැති ලිපියෙන් පසුව, තමිල්නාඩුවෙන් සරණාගතයන් ලෙස ආපසු පැමිණි අය සම්බන්ධයෙන් රජයේ වත්මන් ස්ථාවරය පිළිබඳ විමසූ විට අමාත්‍යවරයා මෙම ප්‍රකාශය කළේය.

ශ්‍රී ලාංකික දෙමළ ජනතාවගේ පුරවැසිභාවය පිළිබඳ අයදුම්පත් සළකා බැලීම තහනම් කරන පරිපාලන උපදෙස් අවලංගු කරන ලෙස නවදිල්ලියෙන් ඉල්ලා සිටීමට අමතරව, තමිල්නාඩු රජය විසින් නිකුත් කරන ලද සත්‍යාපිත හැඳුනුම්පත් ලේඛන මත පදනම්ව පුරවැසිභාවය හෝ දිගු කාලීන වීසා අයදුම්පත් සඳහා සුදුසු අවස්ථාවන්හිදී විදේශ ගමන් බලපත්‍ර සහ වීසා අවශ්‍යතා අත්හැරීම සඳහා විධායක පැහැදිලි කිරීමක් ස්ටාලින් ඉල්ලා සිටියේය.

ස්ටාලින්ගේ ලිපියට අනුව, තමිල්නාඩුව පුරා කඳවුරු තුළ සහ ඉන් පිටත පුද්ගලයන් 89,000ක් පමණ ජීවත් වන අතර, ඔවුන්ගෙන් 40%ක් පමණ එහි උපත ලැබූ අය වෙති.

2009 ජනවාරි මාසයේ සිවිල් යුද්ධය අවසන් වීමෙන් පසු, එම වසරේ මැයි මාසයේ සිට 2025 ජුනි දක්වා වසර 16 තුළ තමිල්නාඩුවේ සිට ශ්‍රී ලංකාවට පුද්ගලයන් 18,542ක් ආපසු පැමිණි බව පෙන්වා දුන් අමාත්‍ය රත්නායක, නැවත පැමිණීමට කැමති අය පිළිගැනීමට රජය නිසැකවම සූදානම් බව පැවසීය.

“කෙසේවෙතත්, ඔවුන්ගෙන් සමහරක්, ඉන්දියාවේ උපන්, හෝ දශක ගණනාවක් එහි ජීවත් වූ, අධ්‍යාපනය ලැබූ සහ සේවය කළ හෝ ඉන්දියානුවකු සමඟ විවාහ වූ අය. ඉන්දීය පුරවැසිභාවය ලබා ගැනීමට තීරණය කරන්නේ නම්, අපට එම ස්ථාවරය සමඟ තර්ක කළ නොහැකියි. එය ඔවුන්ගේ යථාර්ථය සහ එහි පුරවැසිභාවය ලබා ගැනීමේ අයිතියයි,” ඔහු පැවසීය.

තවද, “ඉන්දීය රජයට සහ තමිල්නාඩු රජයට මගේ නිහතමානී ඉල්ලීම නම්, කරුණාකර මැතිවරණ වටා දේශපාලන ප්‍රචාරක මෙවලමක් ලෙස සරණාගතයන් භාවිත නොකරන්න. ඔවුන් දැනටමත් දැවැන්ත දුක් වේදනා විඳදරාගෙන සිටින්නේ; අපි ඔවුන්ගේ ඉල්ලීමට සැළකිල්ලෙන් හා සංවේදීතාවයෙන් සැළකිව යුතුයි” යනුවෙන් ඉන්දියාවේ දේශපාලන ක්‍රියාකාරීන්ට පණිවිඩයක් යවමින් ඔහු පැවසීය

අනුර කුමාර දිසානායක පරිපාලනයේ කැපී පෙනෙන හඬක් වන අමාත්‍ය රත්නායක, 2007 දී තමිල්නාඩුවේ සරණාගත කඳවුරුවලට ගොස්, කඳවුරුවල ජීවත් වන පුද්ගලයන් 28,500කට පුරවැසිභාවය ලබා දෙන නීතියක් සම්මත කර ගැනීමට ශ්‍රී ලංකා රජයට බල කළේය.

2025 මැයි මාසයේදී, වලංගු විදේශ ගමන් බලපත්‍රයක් නොමැතිව දිවයිනෙන් පිටව යෑමේ චෝදනාව මත ඉන්දියාවෙන් ආපසු පැමිණෙන 75 හැවිරිදි ශ්‍රී ලාංකික දෙමළ සරණාගතයකු අත්අඩංගුවට ගැනීම පිළිබඳ යාපනයේ හිටපු පාර්ලිමේන්තු මන්ත්‍රී එම්.ඒ. සුමන්තිරන් ඉස්මතු කළ විට, රජය මේ කාරණය සම්බන්ධයෙන් කටයුතු කරන බව අමාත්‍ය රත්නායක පැවසීය.

“දශක ගණනාවකට පෙර ඊනියා නීති විරෝධී වරායකින් පිටව ගිය බව පවසමින් ආපසු පැමිණෙන අය රඳවා නොගන්නා ලෙස රජය වහාම ආගමන දෙපාර්තමේන්තුවට සහ පොලිසියට උපදෙස් දුන්නා,” ඔහු පැවසීය.