හිටපු ජනාධිපති රනිල් වික්‍රමසිංහගේ බිරිඳ වන හිටපු ජනාධිපති ආර්යා මෛත්‍රී වික්‍රමසිංහ අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන අංශය හමුවේ අද(20) පෙනීසිටීමට නොහැකි බව දන්වා තිබේ.

හිටපු ජනාධිපතිවරයා සම්බන්ධ පරීක්ෂණයක් පිළිබඳව ප්‍රකාශයක් සටහන් කර ගැනීම සඳහා ඇයට එම අංශය හමුවේ පෙනීසිටින ලෙස දැනුම් දී තිබිණි.

වාර්තාවලට අනුව, සෞඛ්‍ය හේතූන් මත ඇයට පැමිණීමට නොහැකි බව සඳහන් වුවද, ඇය නොපැමිණීමට නිශ්චිත හේතුවක් නිල වශයෙන් අනාවරණය කර නොමැත.

මෛත්‍රී වික්‍රමසිංහට නිකුත් කළ නොතීසිය සම්බන්ධයෙන් CIDය පෙබරවාරි 18 වන දින කොළඹ කොටුව මහේස්ත්‍රාත් අධිකරණයට දැනුම්දුන්නේය.

හිටපු ජනාධිපති වික්‍රමසිංහගේ 2023 එක්සත් රාජධානියේ සංචාරය සම්බන්ධයෙන් සිදුවෙමින් පවතින විමර්ශනයට අදාළව ඇය අද CIDයේ මූල්‍ය අපරාධ විමර්ශන අංශය හමුවේ පෙනීසිටීමට නියමිතව තිබිණි.

එක්සත් රාජධානියේ සංචාරයකදී රුපියල් මිලියන 16 කට අධික මුදලක් අවභාවිතය කිරීම සම්බන්ධයෙන් හිටපු ජනාධිපති රනිල් වික්‍රමසිංහ 2025 අගෝස්තු මාසයේදී CIDය විසින් අත්අඩංගුවට ගන්නා ලදී.

ජනාධිපති ධුරය දැරූ කාලය තුළ, රනිල් වික්‍රමසිංහ තම බිරිඳ වන මහාචාර්ය මෛත්‍රී වික්‍රමසිංහගේ උපාධි ප්‍රදානෝත්සවයට සහභාගී වීම සඳහා ලන්ඩනයට යෑමට රාජ්‍ය අරමුදල් අනිසි ලෙස භාවිත කළ බවට පැමිණිල්ලේ සඳහන් වේ.