පකිස්ථානය විසින් ඇෆ්ගන් භූමියට එල්ල කරන ලද මෑතකාලීන ප්‍රහාර ප්‍රසිද්ධියේ හෙළා දකින ලෙස හිටපු ඇෆ්ගනිස්ථාන ජනාධිපති හමීඩ් කර්සායි එක්සත් ජාතීන්ගේ සංවිධානයෙන් ඉල්ලා තිබේ.

එමෙන්ම ඔහු පවසා ඇත්තේ ජාත්‍යන්තර නීතිය උල්ලංඝනය කරන මෙම ප්‍රහාර කලාපීය ස්ථාවරත්වයට තර්ජනයක් බවයි.

එක්සත් ජාතීන්ගේ මහලේකම් ඇන්ටෝනියෝ ගුටරෙස් වෙත ලිපියක් යොමු කරමින් කර්සායි සඳහන් කළේ, මෙම ප්‍රහාර හේතුවෙන් සිවිල් වැසියන් මියගොස් ඇති අතර ඇෆ්ගනිස්ථානයේ ජාතික යටිතල පහසුකම්වලට දැඩි හානි සිදුව ඇති බවයි.

මෙලෙස දිගින් දිගටම සිදුවන දේශසීමා ආක්‍රමණ හේතුවෙන් දැනටමත් අස්ථාවරව පවතින කලාපයේ තත්ත්වය තවදුරටත් නරක අතට හැරිය හැකි බවට ඔහු අනතුරු ඇඟවීය.

එසේම පකිස්ථානය ඇෆ්ගනිස්ථානය කෙරෙහි අනුගමනය කරන ඓතිහාසික ප්‍රවේශය ද කර්සායි විවේචනය කළේය.

පසුගිය දශක හතරක කාලය තුළ ඉස්ලාමාබාද් පාලනය තමන්ගේ බලපෑම පතුරුවා හැරීම සඳහා බොහෝ විට සටන්කාමීත්වය සහ අන්තවාදය මෙවලම් ලෙස භාවිතා කර ඇති බව ඔහු සඳහන් කළේය.

“මෙම උපායමාර්ගය ඇෆ්ගනිස්ථානයේ ස්වෛරීභාවයට නිරන්තරයෙන් තර්ජනයක් වී ඇති අතර ප්‍රචණ්ඩකාරී චක්‍රයක් නිර්මාණය කිරීමට හේතු වී ඇත,” යනුවෙන් කර්සායි සිය ලිපියේ ලියා තිබේ.