බන්ධනාගාරගතව සිටින සංවිධානාත්මක අපරාධ ක්‍රියාවලට සම්බන්ධ පුද්ගලයින් 556 ක් අධීක්ෂණය කරමින් සිටින බව මහජන ආරක්ෂක අමාත්‍ය ආනන්ද විජේපාල පවසයි.

පාර්ලිමේන්තුවේ සභාව කල්තබන අවස්ථාවේ ඇසූ ප්‍රශ්නයකට පිළිතුරු දෙමින් අමාත්‍යවරයා පැවසුවේ, පොලීසිය හා බුද්ධි අංශ විසින් එම අධීක්ෂණ ක්‍රියාවලිය මෙහෙයවන බවයි.

වසරේ මේ දක්වා කාලය තුළ සංවිධානාත්මක අපරාධකරුවන් විසින් වෙඩි තැබීම් 103ක් සිදුකර ඇති බවද අමාත්‍යවරයා සඳහන් කළේය.

ඔහු සඳහන් කළේ, ඊට සම්බන්ධ වෙඩික්කරුවන් 33ක් ඇතුළු සැකකරුවන් 322 කු අත්අඩංගුවට ගෙන ඇති බවයි.

වසරේ මේ දක්වා කාලය තුළ T56 ගිනි අවි 58 ක්, පිස්තෝල 61 ක් ඇතුළු නීති විරෝධී ගිනි අවි 1698 ක් ද පොලිස් භාරයට ගෙන ඇති බව ඔහු ප්‍රකාශ කළේ ය.

අමාත්‍යවරයා පැවසුවේ, රතු නිවේදන නිකුත් කර ඇති විදේශවල සැඟව සිටින සංවිධානාත්මක අපරාධකරුවන් 14ක් මේ වනවිට එම රටවලදී අත්අඩංගුවට ගෙන ඇති බවයි