ශ්‍රී ලංකාවේ සංවිධානාත්මක අපරාධ සහ මත්ද්‍රව්‍ය ජාවාරම් රැසකට සම්බන්ධ ප්‍රධාන සැකකරුවකු බව කියන චරිත් සඳකැලුම් නොහොත් ‘රන් මල්ලි’ නමැත්තා බල්ගේරියාවේදී අත්අඩංගුවට ගෙන ඇති බව පොලිස්පති ප්‍රියන්ත වීරසූරිය පවසයි.

ඉන්ටර්පෝල් (විදේශ පොලිස්) රතු නිවේදන සහ දේශසීමා ආරක්ෂක දත්ත පදනම්වල ඇති තොරතුරු මත පදනම්ව බල්ගේරියානු ආරක්ෂක අංශ විසින් මෙම අත්අඩංගුවට ගැනීම සිදුකර ඇති බව ඉන්ටර්පෝල් සංවිධානය මඟින් තහවුරු කර ඇති බව පොලිස්පතිවරයා පැවසීය.

උදර්පන නීතිය යටතේ සඳකැලුම් නැවත ශ්‍රී ලංකාවට ගෙන ඒම සඳහා විදේශ කටයුතු අමාත්‍යාංශය හරහා මේ වන විට කටයුතු යොදමින් පවතී.

දික්වැල්ල ප්‍රදේශයේ පදිංචිකරුවකු වන සඳකැලුම්, දීර්ඝ කාලයක් ඩුබායි හි සිටිමින් දේශීය මත්ද්‍රව්‍ය ජාවාරම් ජාලයක් මෙහෙයවා ඇති බවට සැකකෙරේ.

දැනට තංගල්ල බන්ධනාගාරයේ රඳවා සිටින නදුන් චින්තක නොහොත් ‘හරක් කටා’ විසින් මෙහෙයවනු ලබන මත්ද්‍රව්‍ය ජාලයේ ප්‍රධාන සාමාජිකයකු ලෙස ද මොහු හඳුනාගෙන ඇත.

වාර්තාවලට අනුව, අන්තර්ජාතික නීති බලාත්මක කිරීමේ බලධාරීන්ගෙන් මිදීම සඳහා කූට ලේඛන භාවිත කරමින් යුරෝපයට ඇතුළු වීමට උත්සාහ කිරීමේදී සඳකැලුම් අත්අඩංගුවට ගෙන තිබේ.

ඔහු මෙරටට ගෙන ඒමෙන් පසුව, කිරින්ද ‘අයිස්’ මත්ද්‍රව්‍ය ජාවාරම, මුදල් විශුද්ධිකරණය සහ අනෙකුත් සංවිධානාත්මක අපරාධ සඳහා ඔහුගේ ඇති සම්බන්ධතාවය පිළිබඳව පොලිස් මත්ද්‍රව්‍ය නාශක කාර්යාංශය සහ අපරාධ පරීක්ෂණ දෙපාර්තමේන්තුව මඟින් පුළුල් විමර්ශන පැවැත්වීමට නියමිතය.

සඳකැලුම්ට එරෙහි ප්‍රධාන නඩුවක් වන්නේ 2025 නොවැම්බර් මාසයේදී කිරින්දෙන් සොයාගත් රුපියල් මිලියන 300කට වඩා වටිනා කිලෝග්‍රෑම් 345ක ක්‍රිස්ටල් මෙතඇම්ෆටමින් (‘අයිස්’) මත්ද්‍රව්‍ය තොගයයි. නොවැම්බර් 12 වන දින කිරින්ද අන්දගලවැල්ල වෙරළ තීරයේදී බස්නාහිර උතුර අපරාධ කොට්ඨාසය, තංගල්ල අපරාධ කොට්ඨාසය සහ පොලිස් මත්ද්‍රව්‍ය නාශක කාර්යාංශය එක්ව සිදුකළ වැටලීමකදී මෙම මත්ද්‍රව්‍ය තොගය අත්අඩංගුවට ගන්නා ලදී.

එම අවස්ථාවේදී ඩුබායි හි සිටි බව කියන සඳකැලුම් මෙම මත්ද්‍රව්‍ය තොගයේ හිමිකරු ලෙස පොලිස් පරීක්ෂණවලදී හඳුනාගෙන තිබිණි. මෙම මත්ද්‍රව්‍ය දිවයිනේ විවිධ ප්‍රදේශවලට ප්‍රවාහනය කිරීම සඳහා ඔහු සැකකරුවන් කිහිප දෙනෙකුට උපදෙස් දී තිබූ අතර, ඔවුන්ගේ සම්බන්ධතාවය වෙනුවෙන් එක් අයෙකුට රුපියල් 500,000 බැගින් ගෙවා ඇති බවට ද චෝදනා එල්ල වී ඇත.

මෙම සිද්ධියට සම්බන්ධයෙන් සැකකරුවන් අටදෙනකු සහ වාහන හයක් අත්අඩංගුවට ගත් අතර, වැඩිදුර විමර්ශන සඳහා තිස්සමහාරාම මහේස්ත්‍රාත් අධිකරණය විසින් දින හතක රඳවා තබාගැනීමේ නියෝග ලබාදෙන ලදී.

2021 ජූලි මාසයේදී කොට්ටාව ප්‍රදේශයෙන් සොයාගත් මත්ද්‍රව්‍ය ජාවාරමෙන් උපයාගත් බවට සැකකෙරෙන රුපියල් මිලියන 13.9ක මුදලක් සම්බන්ධයෙන් කෙරෙන ප්‍රධාන මුදල් විශුද්ධිකරණ විමර්ශනයක ද සඳකැලුම් ප්‍රධාන සැකකරුවෙකි.

මෙම මුදල් පන්නිපිටිය ප්‍රදේශයේ කුලියට ගත් නිවසක වළදමා තිබියදී සොයා ගැනිණි. ශ්‍රී ලංකාවේ සිය මූල්‍ය කටයුතු අධීක්ෂණය කිරීම සඳහා සඳකැලුම් විසින් ඔහු යොදවා ඇති බවට විමර්ශකයින් තොරතුරු අනාවරණය කර ගැනීමෙන් පසුව, අදාළ නිවස කුලියට ගෙන තිබූ ඔහුගේ බෑණනුවන් වන දිනේෂ් ලක්මාල් නැමැත්තා අත්අඩංගුවට ගන්නා ලදී.

2022 වසරේ හම්බන්තොට මහා රාවණා කොටුව ආසන්න මුහුදේදී කිලෝග්‍රෑම් 331ක හෙරොයින් තොගයක් අත්අඩංගුවට ගැනීමේ මහා පරිමාණ මුහුදු මත්ද්‍රව්‍ය ජාවාරමකට ද සඳකැලුම් සම්බන්ධ බවට බුද්ධි වාර්තා මඟින් අනාවරණය වී ඇත.

ශ්‍රී ලංකා නාවික හමුදාව, පොලිස් විශේෂ කාර්ය බළකාය (STF) සහ පොලිස් මත්ද්‍රව්‍ය නාශක කාර්යාංශය එක්ව සිදුකළ මෙහෙයුමකදී මෙම මත්ද්‍රව්‍ය තොගය අත්අඩංගුවට ගත් අතර, විමර්ශකයින් විසින් මෙම මෙහෙයුමේ මහමොළකරු ලෙස සඳකැලුම් හඳුනාගෙන තිබේ.