නේපාලයේ ගෝර්කා දිස්ත්‍රික්කයේ ඇති වූ හදිසි ගංවතුර තත්ත්වයක් හේතුවෙන් නිවාස සහ පාලම් ගසාගෙන ගොස් ඇති අතර, ජල විදුලි ව්‍යාපෘති කඳවුරකට ද හානි සිදුවී තිබේ. මේ නිසා ගංගා ඉවුරුවල පදිංචි වැසියන්ට වහාම ආරක්ෂිත ස්ථාන වෙත ඉවත් වන ලෙස එරට බලධාරීන් දැඩි ලෙස දැනුම් දී ඇත.

නිලධාරීන් පවසන පරිදි, චුම්නුබ්‍රි ප්‍රදේශයේ ඇති වූ නායයෑමක් හේතුවෙන් ජල මාර්ගයක් අවහිර වීමෙන් පසු, බුධි ගණ්ඩකි ගඟේ ජල මට්ටම හදිසියේ ඉහළ යෑමෙන් අද අලුයම මෙම ගංවතුර තත්ත්වය හටගෙන තිබේ.

මෙම ගංවතුර උවදුර නිසා නිවාස දුසිමක් පමණ සහ එල්ලෙන පාලම් දෙකක් ගසාගෙන ගොස් ඇති අතර, ගෝර්කා දිස්ත්‍රික්කය අසල්වැසි ධාඩිං දිස්ත්‍රික්කය සමඟ සම්බන්ධ කරන මහාමාර්ග පාලමද විනාශ වී ඇත. මීට අමතරව, ජල විදුලි ව්‍යාපෘති කඳවුරකට ද දැඩි හානි සිදුවී තිබේ.

නවතම වාර්තා වන විට කිසිදු මරණයක් වාර්තා වී නොමැත.

ජගත් ප්‍රදේශයේ නායයෑමක් හේතුවෙන් අනතුරට ලක්ව සිටි පුද්ගලයන් හයක් නේපාල හමුදාව විසින් බේරාගෙන ඇති අතර, බලපෑමට ලක් වූ ජල විදුලි ව්‍යාපෘති කඳවුරේ සේවකයින් 18 දෙනකු ආරක්ෂිතව ඉවත් වීමට සමත් වී ඇතැයි බලධාරීහු පවසති.

ජාතික අවදානම් අවම කිරීමේ සහ කළමනාකරණ අධිකාරි විසින් ගෝර්කා, තනාහුන්, චිත්වන්, නැගෙනහිර නවාල්පරාසි සහ බටහිර නවාල්පරාසි යන දිස්ත්‍රික්කවල ප්‍රජාවන්ට අනතුරු ඇඟවීම් නිකුත් කරමින් ඉල්ලා ඇත්තේ, අවදානම් සහිත ප්‍රදේශවල පදිංචිකරුවන් වහාම ඉවත් වන ලෙසත්, අවශ්‍ය තැනදී ගැලවුම්කරුවන්ට සහාය වන ලෙසත්ය.

ගංගා මට්ටම ඉහළ යාම සහ තවදුරටත් ගංවතුර ඇති විය හැකි බවට පවතින අවදානම හමුවේ හමුදා සහ පොලිස් භට පිරිස් අදාළ ප්‍රදේශයට ළඟ වී ඇති අතර, නිලධාරීන් හෙලිකොප්ටර් මඟින් තත්ත්වය නිරීක්ෂණය කරමින් සිටිති.

බුධි ගණ්ඩකි ගඟ, ත්‍රිශූලි ගංගා පද්ධතියට සම්බන්ධ වන අතර, එම පද්ධතිය පසුගිය අගෝස්තු මාසයේදී ඇති වූ විනාශකාරී ගංවතුරකින් දැඩි ලෙස බලපෑමට ලක් විය. එහිදී පුද්ගලයින් 1,457 දෙනෙකු මියගිය අතර තවත් දහස් ගණනක් අතුරුදන් විය.