මෑතකදී හඳුන්වා දෙන ලද ‘මෙට්‍රෝ’ බස් රථ සේවාව කෙරෙහි පසුගිය සති කිහිපය තුළ දැඩි අවධානයක් යොමු වී තිබේ.

ප්‍රවාහනය පිළිබඳ පාර්ලිමේන්තු කාරක සභා රැස්වීමකදී සමගි ජන බලවේගයේ (SJB) පාර්ලිමේන්තු මන්ත්‍රී ජගත් විතාන මහතා විසින් අදාළ කරුණු කිහිපයක් ප්‍රශ්න කිරීමත් සමඟ මෙම මාතෘකාව කරලියට පැමිණියේය.

ඉන් එක් ප්‍රශ්නයක් වූයේ පූජ්‍ය පක්ෂය සඳහා ආසනයක් වෙන් කර නොමැත්තේ මන්ද යන්නයි. ඊට පිළිතුරු ලැබුණේ තවත් දින කිහිපයකින් එය සිදුකරන බවයි.

බස් රථයේ ඉන්ධන කාර්යක්ෂමතාව පිළිබඳ ගැටලුව ද එහිදී මතු වූ තවත් කරුණකි.

මීට අමතරව බස් රථයේ ගමන් කළ හැකි මගීන් සංඛ්‍යාව සහ ආසන සංඛ්‍යාව පිළිබඳව ද ප්‍රශ්න මතු විය. “මෙම බස් රථයේ මගීන් 80 දෙනෙකුට ගමන් කළ හැකි බව ප්‍රචාරය කර තිබුණද, එහි ඇත්තේ ආසන 40ක් පමණයි. ඒ නිසා මගීන්ට සාමාන්‍ය බස් ගාස්තුවට වඩා වැඩි මුදලක් ගෙවීමට සිදුවන අතරම බස් රථයේ හිටගෙන ගමන් කිරීමට ද සිදුවී තිබෙනවා” යැයි මන්ත්‍රී ජගත් විතාන පැවසීය.