පාර්ලිමේන්තු මන්ත්‍රී මුජිබර් රහුමාන්ට එරෙහිව අපහාසාත්මක ප්‍රකාශ අන්තර්ජාලයේ පළකිරීම සම්බන්ධයෙන් එක්සත් ජාතික ස්වයං රැකියා නියුක්තිකයන්ගේ සංගමයේ සභාපති සහ සමගි ජන බලවේගයේ හිටපු සාමාජිකයකු වන ප්‍රදීප් චාල්ස් ඇතුළු තවත් කිහිප දෙනෙකුට එරෙහිව කොළඹ ප්‍රධාන මහේස්ත්‍රාත් තනුජා ලක්මාලි කොන්දේසි සහිත තහනම් නියෝගයක් නිකුත් කර තිබේ.

2024 අංක 9 දරන මාර්ගගත ආරක්ෂණ පනතේ 24 වැනි වගන්තිය යටතේ පාර්ලිමේන්තු මන්ත්‍රී මුජිබර් රහුමාන් විසින් ගොනු කරන ලද පැමිණිල්ලක් සළකා බැලීමෙන් පසු මෙම නියෝගය ලබා දී ඇත.

පෙත්සමේ නම් කර ඇති වගඋත්තරකරුවන් අතර ප්‍රදීප් චාල්ස් මෙන්ම යූ ටියුබ් නාලිකා හිමිකරුවන් වන නදීෂා අමරනාත් සහ තුෂාරා සෙව්වන්දි ද ඇතුළත් වේ.

පැමිණිලිකරු වෙනුවෙන් පෙනී සිටි නීතිඥ ලක්ෂාන් ඩයස් අධිකරණයට දන්වා සිටියේ පළමු වගඋත්තරකරු මාධ්‍ය හරහා පැමිණිලිකරු පිළිබඳ දිගින් දිගටම අපහාසාත්මක හා හානිකර ප්‍රකාශ නිකුත් කරන ක්‍රියාකාරී දේශපාලන චරිතයක් බවයි.

ඔහු තවදුරටත් කියා සිටියේ පැමිණිලිකරු විසින් කොළඹ දිසා අධිකරණයේ දැනටමත් අපහාස නඩුවක් ගොනු කර ඇති බවත් ඔහුට පක්ෂව තීන්දුවක් ලැබුණු බවත්ය.

එසේ තිබියදීත්, පළමු වගඋත්තරකරු තහනම් ප්‍රකාශ නිකුත් කිරීම දිගටම කරගෙන ගොස් ඇති නිසා පැමිණිලිකරුට අන්තර්ජාල ආරක්ෂණ පනත යටතේ තහනම් නියෝගයක් ඉල්ලා සිටීමට සිදුවූ බවයි.

අනෙකුත් වගඋත්තරකරුවන්ට එම අන්තර්ගතය යූ ටියුබ් සහ අනෙකුත් වේදිකා හරහා අන්තර්ජාලයට උඩුගත කිරීමෙන් වළක්වන ලෙස ද පැමිණිල්ල මගින් ඉල්ලා සිටියේය.

ඉදිරිපත් කිරීම් සළකා බැලූ ප්‍රධාන මහේස්ත්‍රාත්වරයා කොන්දේසි සහිත තහනම් නියෝගයක් නිකුත් කළ අතර ජුනි 27 වැනි දින අධිකරණය හමුවේ පෙනී සිටින ලෙස සියලුම වගඋත්තරකරුවන්ට නියෝග කළේය.