ඉන්දියාවේ සමස්ත විදුලි නිෂ්පාදනය තුළ ගල් අඟුරු බලශක්ති ප්‍රතිශතය ජූලි මාසයේදී පසුගිය වසරක කාලය තුළ වාර්තා වූ අඩුම මට්ටම දක්වා පහත වැටී ඇති බව රජයේ දත්ත උපුටා දක්වමින් විදෙස් ජනමාධ්‍ය වාර්තා කරයි. ඒ සඳහා ප්‍රධාන වශයෙන් බලපා ඇත්තේ එම මාසය තුළ පුනර්ජනනීය බලශක්ති නිෂ්පාදනය වාර්තාගත ලෙස ඉහළ යාමයි.

ලැබී ඇති දත්තවලට අනුව, ඉන්දියාවේ සමස්ත විදුලි නිෂ්පාදනයෙන් සියයට 20 ක් ම පුනර්ජනනීය බලශක්තියෙන් ලබාගෙන ඇත.

එය ජූලි මාසයේදී කිලෝවොට් පැය බිලියන 36.25 ක් ලෙස සටහන් වූ අතර, එය පසුගිය වසරේ සමාන කාලපරිච්ඡේදයට වඩා සියයට 30 ක වර්ධනයකි.

‘ග්‍රිඩ්-ඉන්දියා’ නියාමන ආයතනයේ දෛනික දත්ත පදනම් කරගනිමින් රොයිටර් පුවත් සේවය කළ ගණනය කිරීම්වලට අනුව, ජූනි මාසයේදී සියයට 69 ක් ලෙස පැවති ගල් අඟුරු විදුලි නිෂ්පාදන ප්‍රතිශතය ජූලි මාසයේදී සියයට 65.7 දක්වා පහත වැටී තිබේ.

ඉන්දියාවේ පිරිසිදු බලශක්ති නිෂ්පාදනයේ මෙම වර්ධනයට සූර්ය සහ පවන් බලශක්ති නිෂ්පාදනය ප්‍රධාන වශයෙන් දායක වී ඇත. ජූලි 13 වන දින සූර්ය සහ පවන් බලශක්ති ධාරිතාව ප්‍රථම වතාවට ගිගාවොට් 100 සීමාව පසුකළ අතර, එදින ඉන්දියාවේ සමස්ත විදුලි සැපයුමෙන් වාර්තාගත සියයට 42.8 ක ප්‍රතිශතයක් එමඟින් සපයා දී ඇත.

විදුලි බලය සඳහා වන උපරිම ඉල්ලුමෙන් වැඩි ප්‍රමාණයක් වාර්තා වන්නේ දහවල් කාලයේදී බවත්, ඒ සඳහා සූර්ය බලශක්තියෙන් ලැබෙන දායකත්වය සැලකිය යුතු ලෙස ඉහළ ගොස් ඇති බවත් ‘ශක්තිය සහ පිරිසිදු වාතය පිළිබඳ පර්යේෂණ මධ්‍යස්ථානයේ’ (CREA) විශ්ලේෂකයෙකු වන මනෝජ් කුමාර් පවසයි. රටේ සමස්ත විදුලි නිෂ්පාදනය තුළ පුනර්ජනනීය බලශක්ති ප්‍රතිශතය ඉහළ යාමට මෙය ප්‍රධාන හේතුවක් බව ඔහු වැඩිදුරටත් පෙන්වා දෙයි.

කෙසේ වෙතත්, ඉකුත් ජූලි මාසයේදී ගල් අඟුරු ඇසුරින් සිදුකළ විදුලි නිෂ්පාදනය පසුගිය වසරට සාපේක්ෂව සියයට 12.8 කින් ඉහළ ගොස් කිලෝවොට් පැය බිලියන 119.40 ක් ලෙස සටහන් වී ඇත.

ප්‍රබල ‘එල් නිනෝ’ (El Nino) කාලගුණික තත්ත්වය හේතුවෙන් ඇති වූ දැඩි රශ්මිය නිසා රාත්‍රී කාලයේදී විදුලි පංකා සහ වායුසමීකරණ සඳහා වන ඉල්ලුම ඉහළ යාම සහ ජලවිදුලි නිෂ්පාදනය පහත වැටීම, ගල් අඟුරු විදුලි නිෂ්පාදනය මෙලෙස ඉහළ යාමට ප්‍රධාන හේතු ලෙස විශ්ලේෂකයෝ පෙන්වා දෙති.