ඉන්දියානු ප්‍රහසන රංගන ශිල්පිනියක වන අංකිතා ශ්‍රීවාස්තව්, තමන් සයිබර් වංචාවකට ගොදුරු වූ ආකාරය පිළිබඳ පළමු වරට ප්‍රසිද්ධියේ අදහස් දක්වා තිබේ.

නීතිය ක්‍රියාත්මක කරන නිලධාරීන් ලෙස පෙනී සිටිමින් වංචාකරුවන් ඇගෙන් ඉන්දියානු රුපියල් 900,000ක් කොල්ලකෑ ආකාරය ඇය මෙහිදී හෙළි කර ඇත.

ඇගේ නමින් ඉරාකයට යවන ලද පාර්සලයක මත්ද්‍රව්‍ය අඩංගු බවට චෝදනා කළ ෆෙඩෙක්ස් වෙතින් යැයි කියා ගන්නා පුද්ගලයකුගෙන් ඇයට දුරකථන ඇමතුමක් ලැබුණු ආකාරය ශ්‍රීවාස්තව් යූ ටියුබ් හි උඩුගත කරන ලද විකට රංගනයක් හරහා විස්තර කරයි.

පසුව ඇමතුම ලබා දුන් පුද්ගලයා පොලිස් නිල ඇඳුමින් සැරසුණු පුද්ගලයන් දෙදෙනෙකුට වීඩියෝ ඇමතුමක් හරහා ඇයව සම්බන්ධ කළ බවත්, ඔවුන් කියා සිට ඇත්තේ ඇයගේ අනන්‍යතාව තහවුරු කර ගැනීමට සහ ඇය පාර්සලයට සම්බන්ධ දැයි තීරණය කිරීමට අවශ්‍ය බවයි.

පැය අටකට ආසන්න කාලයක් වීඩියෝ ඇමතුමක් හරහා තමාව නිරීක්ෂණය කරන ලද අතර කැමරාව ක්‍රියා විරහිත නොකරන ලෙස, නිවසින් පිටව නොයන ලෙස හෝ කිසිවකු සම්බන්ධ කර නොගන්නා ලෙස තමාට උපදෙස් දුන් බව ශ්‍රීවාස්තව් පවසයි.

“පීඩනය නිසා ටික වේලාවකට පසු, මට ව්‍යාකූලත්වයක් සහ මානසිකව වෙහෙසක් දැනුණා,” යනුවෙන් ඇය බීබීසීයට පැවසුවාය.

තත්ත්වය සැබෑ බව විශ්වාස කරමින්, ඇය වංචාවකට ගොදුරු වූ බව වටහා ගැනීමට පෙර රුපියල් 900,000ක ගනුදෙනුවක් ඇය අනුමත කර තිබේ.

ශ්‍රීවාස්තව් පැවසුවේ පසුව සෙසු පිරිස දැනුවත් කිරීම සඳහා තම අත්දැකීම් ප්‍රසිද්ධියේ බෙදා ගැනීමට තෝරා ගත් අතර උගත් හා සාමාන්‍ය බුද්ධිමත් පුද්ගලයකු රැවටිය හැකි නම්, එය ඕනෑම කෙනෙකුට සිදුවිය හැකි බවයි.

ඉන්දියාවේ සයිබර් අපරාධ සිදුවීම් වැඩිවීම මධ්‍යයේ ඇගේ මෙම සිද්ධිය වාර්තා වේ.