වාහන ආනයනය සඳහා පනවන ලද 50%ක අධිභාරය සම්බන්ධයෙන් මුදල් හා සැලසුම් නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු අද (16) විශේෂ පැහැදිලි කිරීමක් සිදු කළේය.

පසුගිය මාස දෙක තුළ ආනයන වියදම් තියුණු ලෙස ඉහළ ගොස් ඇති බවත්, එමඟින් රටේ විදේශ සංචිත කළමනාකරණය කිරීම සඳහා තාවකාලිකව මෙම පියවර හඳුන්වා දීමට රජය පෙළඹවූ බවත් නියෝජ්‍ය අමාත්‍යවරයා ප්‍රකාශ කළේය.

රජයේ ප්‍රවෘත්ති දෙපාර්තමේන්තුවේ පැවති විශේෂ මාධ්‍ය හමුවක් අමතමින් ඔහු මෙම අදහස් පළ කළේය.

මෙම පියවර වාහන ආනයනය සඳහා තහනමක් හෝ ස්ථිර සීමාවක් නොවන බව අවධාරණය කරමින් ආචාර්ය ප්‍රනාන්දු සඳහන් කළේ, අධිභාරය මාස තුනක් සඳහා පමණක් ක්‍රියාත්මක වන බවයි.

වහාම වාහන ආනයනය කිරීමට කැමති පුද්ගලයන්ට අතිරේක අධිභාරය ගෙවීමට සිදුවන බව ඔහු පැවසීය.

වාහන ආනයනය මාස තුනක් කල් දැමීමට හැකි ආනයනකරුවන්ට අමතර පිරිවැය වළක්වා ගත හැකි බව ඔහු තවදුරටත් පෙන්වා දුන්නේය.

“පසුගිය මාස දෙක තුළ ආනයන වියදම් ඇමරිකානු ඩොලර් බිලියන 2කට වඩා වැඩි වී ඇති නිසා අපි දැනට අභියෝගයකට මුහුණ දී සිටිනවා. ඊට අමතරව, වාහන ආනයනය සඳහා ණයවර ලිපි (LC) මෑතකදී ඉතා වේගයෙන් විවෘත කරලා තියෙනවා. එමනිසා, පුද්ගලික භාවිතය සඳහා ආනයනය කරන වාහන සඳහා මාස තුනක කාලයකට බදු වැඩි කිරීමට අපි තීරණය කළා.”යැයි ඔහු පැවසීය.

මෙම පියවරේ අරමුණ හැකි සෑම විටම, මාස තුනක කාලය තුළ පෞද්ගලික භාවිතය සඳහා වාහන ආනයනය කල් දැමීමට මහජනතාව දිරිමත් කිරීම බව ඔහු පැවසූ අතර, මෙම පියවර මගින් ස්ථිරවම මිල වැඩි කිරීමට අදහස් නොකළ බව ඔහු පැවසීය.

“අපි සම්පූර්ණ තහනමක් පැනවූවා නම්, අත්‍යවශ්‍ය අවශ්‍යතාවයක් ඇති අයට කිසිසේත් වාහන ආනයනය කිරීමට නොහැකි වෙනවා,” ඔහු පැවසීය.

“ඇත්ත වශයෙන්ම පනවා ඇත්තේ පවතින 30% රේගු බද්දෙන් 50%ක අධිභාරයක් පමණයි. ඒ අනුව, ඵලදායී වැඩිවීම 15%ක් පමණයි. වාහන මිල 50%කින් ඉහළ යන බවට කරන ප්‍රකාශ සම්පූර්ණයෙන්ම නොමඟ යවන සුළුයි. එවැනි වැඩිවීමක් සිදු වෙන්නේ නැහැ. වැඩිවීමක් සිදු වුවත් එය 15%ක් පමණක් වගේ වෙයි. එම අමතර පිරිවැය අදාළ වන්නේ ඉදිරි මාස තුන සඳහා ආනයන කල් දැමීමට නොහැකි අයට පමණයි. එය සමස්ත වෙළඳපල මිල ගණන් කෙරෙහි පුළුල් බලපෑමක් ඇති කරන එකක් නැහැ” ඔහු තවදුරටත් පැවසීය.