ඇෆ්ගනිස්ථානයේ කාබුල්හි මත්ද්‍රව්‍ය ප්‍රතිකාර මධ්‍යස්ථානයකට පකිස්ථානය එල්ල කළ ගුවන් ප්‍රහාරය නීති විරෝධී බවත්, එය යුද අපරාධයක් විය හැකි බවත් හියුමන් රයිට්ස් වොච් (Human Rights Watch) සංවිධානය පවසයි.

සිවිල් වැසියන් මියගිය මෙම සිදුවීම සම්බන්ධයෙන් වහාම අපක්ෂපාතී පරීක්ෂණයක් පවත්වා වගකිවයුත්තන්ට දඬුවම් කරන ලෙස එම සංවිධානය ඉල්ලා සිටී.

ජාත්‍යන්තර මානුෂීය නීතියට අනුව, සිවිල් වැසියන් ආරක්ෂා කිරීමටත්, ප්‍රහාර එල්ල කරනු ලබන ඉලක්ක නීත්‍යානුකූල මිලිටරි අරමුණු දැයි තහවුරු කර ගැනීමටත් සෑම පාර්ශ්වයක්ම බැඳී සිටින බව එම සංවිධානය නිකුත් කළ නිවේදනයක දැක්වේ.

හියුමන් රයිට්ස් වොච් හි ආසියානු කලාපීය නියෝජ්‍ය අධ්‍යක්ෂිකා පැට්‍රීෂියා ගොස්මන් (Patricia Gossman) ප්‍රකාශ කළේ පවතින සාක්ෂිවලට අනුව මෙම ප්‍රහාරය නීති විරෝධී බවයි.

සිවිල් වැසියන්ගෙන් පිරී තිබූ මධ්‍යස්ථානයක් ඉලක්ක කළේ ඇයිද යන්න සහ ඒ සඳහා වගකිව යුත්තේ කවුරුන්ද යන්න සෙවීමට පකිස්ථාන බලධාරීන් පරීක්ෂණයක් පැවැත්විය යුතු බව ඇය වැඩිදුරටත් පැවසුවාය.

පසුගිය මාර්තු 16 වන දින පකිස්ථානය විසින් කාබුල් සහ නන්ගර්හාර් (Nangarhar) ප්‍රදේශවල ඉලක්ක නවයකට පමණ ගුවන් ප්‍රහාර එල්ල කරන ලදී.

මෙහිදී නැගෙනහිර කාබුල්හි පිහිටි ‘ඔමිඩ්’ (Omid) ප්‍රතිකාර මධ්‍යස්ථානයට බෝම්බ ප්‍රහාර එල්ල වූ අතර, එම අවස්ථාවේ සිය ගණනක් පිරිසක් එහි ප්‍රතිකාර ලබමින් සිටියහ.