අනුරාධපුර පූජා නගරයේ මාරාන්තික උපවාසයක නිරතව සිටි බලංගොඩ කස්සප භික්ෂුව ඇතුළු සත්දෙනකු නොවැම්බර් 26 වැනිදා දක්වා රක්ෂිත බන්ධනාගාරගත කරන ලෙස අනුරාධපුර මහේස්ත්‍රාත් අධිකරණය නියෝග කර තිබේ.

පූජා භූමිය තුළ සිය විරෝධතාව අඛණ්ඩව පවත්වාගෙන යමින් සැකකරුවන් මීට පෙර නිකුත් කර තිබූ අධිකරණ නියෝග කඩකර ඇති බවට එල්ල වූ චෝදනා මත අධිකරණය මෙම නියෝගය නිකුත් කළේය.

සැකකරුවන් හත්දෙනාම මානසික වෛද්‍ය පරීක්ෂණවලට සහ ඔවුන් මත්ද්‍රව්‍ය භාවිත කර ඇත්දැයි තහවුරු කර ගැනීමේ පරීක්ෂණවලට යොමුකරන ලෙස ද මහේස්ත්‍රාත්වරයා වැඩිදුරටත් නියෝග කළේය.

රුවන්වැලි මහා සෑය අසල පැවති මෙම උපවාසය ආරම්භ කර තිබුණේ යෝජිත අනුරාධපුර පූජා නගර සංවර්ධන සැලැස්මට විරෝධය පළකිරීමට සහ ගලගොඩඅත්තේ ඥානසාර භික්ෂුව නිදහස් කරන ලෙස ඉල්ලා සිටීමටය.

බ්‍රහස්පතින්දා (12) රාජාංගණයේ සද්ධාරතන ඇතුළු පිරිසක් විරෝධතාව පැවති ස්ථානයට පැමිණීමත් සමඟ දෙපාර්ශ්වය අතර ගැටුමක් හටගෙන උණුසුම් තත්ත්වයක් ඇතිවිය.

එම ගැටුමින් සද්ධාරතන හිමියන්ගේ හිසට තුවාල සිදු වූ අතර පසුව ඔහුව රෝහල්ගත කෙරිණි.

පසුව පොලිසිය මැදිහත් වී පූජ්‍ය බලංගොඩ කස්සප භික්ෂුව ඇතුළු පිරිසක් අත්අඩංගුවට ගනු ලැබීය.

සැකකරුවන් අනුරාධපුර මහේස්ත්‍රාත් අධිකරණයට ඉදිරිපත් කිරීමෙන් අනතුරුව මෙම රක්ෂිත බන්ධනාගාරගත කිරීමේ නියෝගය සහ වෛද්‍ය පරීක්ෂණ සඳහා වන නියෝග නිකුත්කෙරිණි.