කථානායක මහින්ද යාපා අබේවර්ධනට එරෙහිව ගෙන ආ විශ්වාසභංග යෝජනාව පිළිබඳ තෙදින විවාදය සඳහා වැය කළ මුදල විපක්ෂයෙන් ඉල්ලා ගැනීමේ යෝජනාවක් ගෙන ඒමට ආණ්ඩු පක්ෂයෙන් අදහසක් ඉදිරිපත් වී තිබේ.

ආණ්ඩු පක්ෂ පාර්ලිමේන්තු මන්ත්‍රී චාමර සම්පත් දසනායක රැස්වීමකදී කියාසිටියේ ඉදිරි පාර්ලිමේන්තු සැසිවාරයේදී මෙම යෝජනාව ගෙන ඒමට රජය අපේක්ෂා කරන බවයි.

කථානායකවරයාට එරෙහි විශ්වාසභංග යෝජනාව පිළිබඳ දින තුනක විවාදයට විශාල මුදලක් අපතේ ගොස් ඇති බවත්, මෙම මුදල් විපක්ෂයෙන් ඉල්ලා සිටීමට සැලසුම් කර ඇති බවත් ඔහු පැවසීය.

කථානායකවරයාට එරෙහිව ගෙන ආ විශ්වාසභංග යෝජනාව නිෂ්ඵල ව්‍යායාමයක් බව ඔහු වැඩිදුරටත් පැවසීය.

මේ සම්බන්ධයෙන් අදහස් දැක්වූ සමගි ජන බලවේගයේ පාර්ලිමේන්තු මන්ත්‍රී ඉරාන් වික්‍රමරත්න කියා සිටියේ පක්ෂ නායක රැස්වීමක් කැඳවා එය දින තුනකින් දීර්ඝ කිරීමට කටයුතු කළේ රජය බවයි.

“විවාදය දින දෙකක් තියෙන්න තිබුණේ. විවාදයේ පළමු දිනයේදී හදිසියේම රජය පාර්ලිමේන්තු ව්‍යාපාර කාරක සභා රැස්වීමක් කැඳවා විවාදය දින 3ක් දක්වා දීර්ඝ කිරීමට අවශ්‍ය බව කිව්වේ කතා කිරීමට අවශ්‍ය බොහෝ කථිකයන් ආණ්ඩු පාර්ශ්වයේ සිටින බව පවසමින්. සැබෑ තත්ත්වය වූයේ ආණ්ඩු පක්ෂයේ මන්ත්‍රීවරුන් බොහෝ දෙනෙක් විදේශගතව සිටීම නිසා කථානායකවරයා ආරක්ෂා කර ගැනීමට ඡන්දය සඳහා ඔවුන් නැවත කැඳවීමට අවශ්‍ය වීමයි. ඒ නිසා තමයි විවාදය අමතර දිනයක් දීර්ඝ කළේ.‘‘ යැයිද වික්‍රමරත්න මන්ත්‍රීවරයා පැවසීය.

විශ්වාසභංග යෝජනාව පිළිබඳ විවාදයෙන් අනතුරුව විශේෂ ප්‍රකාශයක් කළ කථානායකවරයා දින තුනක විවාදය සඳහා සභාවට රුපියල් මිලියන 45ක් වැය වූ බව නිවේදනය කළේය.

පාර්ලිමේන්තු මාධ්‍ය කාර්යාලයට අනුව 2024 අප්‍රේල් 01 වැනි දින සභාව නැවත රැස්වීමට බලාපොරොත්තු වේ.

එහිදී අලුත් අවුරුදු නිවාඩුව ලබා දී සතිය දින දෙකකට සීමාකිරීමට නියමිතය.

සභාවේ න්‍යාය පත්‍රය මේ සතිය අගදී රැස්වන පක්ෂ නායකයන් විසින් තීරණය කිරීමට නියමිතව තිබේ.