ශ්‍රීලන්කන් ගුවන් සේවය සඳහා නව සභාපතිවරයකු සහ ප්‍රධාන විධායක නිලධාරියකු කඩිනමින් පත් කිරීමට රජය බලාපොරොත්තු වන බව ගුවන්සේවා අමාත්‍ය අනුර කුමාරණාතිලක පවසයි.

අමාත්‍යවරයා සඳහන් කළේ නව ප්‍රධාන විධායක නිලධාරියා පත් කිරීම සඳහා වන සම්මුඛ පරීක්ෂණ මේ වන විටත් ක්‍රියාත්මක වෙමින් පවතින අතර ඒ සඳහා කණ්ඩායම් කිහිපයක් දැනටමත් ඇගයීමට ලක් කර ඇති බවයි.

අවසන් වටයේ තේරීම් කටයුතු සඳහා කෙටි ලේඛනයක් සකස් කිරීමට පෙර තවත් අයදුම්කරුවන් කිහිපදෙනෙකු සම්මුඛ පරීක්ෂණ සඳහා කැඳවීමට නියමිත බව පෙන්වා දුන් ඔහු, ඉතා කෙටි කලකින් නව ප්‍රධාන විධායක නිලධාරියා පත් කිරීමට හැකි වනු ඇති බව ප්‍රකාශ කළේය.

මෙම පත්වීම් ප්‍රමාද වීම සම්බන්ධයෙන් අදහස් දක්වමින් අමාත්‍යවරයා පිළිගත්තේ, ශ්‍රීලන්කන් ගුවන් සේවය මේ වන විට සභාපතිවරයකු සහ ප්‍රධාන විධායක නිලධාරියකු යන දෙදෙනාම නොමැතිව ක්‍රියාත්මක වන බවයි.

සභාපති ධුරය සඳහා මීට පෙර ඉදිරිපත් වූ යෝජනා විවිධ හේතූන් මත ඉදිරියට ගෙන යෑමට නොහැකි වූ බවත්, කෙසේවුවද මේ වන විට එම ධුරය සඳහා ‘ඉතා යහපත් යෝජනාවක්’ ලැබී ඇති බවත් ඔහු මෙහිදී අනාවරණ කළේය.

එසේම, ජනාධිපති අනුර කුමාර දිසානායක මීට පෙර කළ ප්‍රකාශයන්ට අනුකූලව, ගුවන් සේවයේ සම්පූර්ණ රාජ්‍ය හිමිකාරිත්වය රඳවා ගනිමින් එය යළි නඟාසිටුවීමට රජය මුලින් උත්සාහ කළ බව අමාත්‍යවරයා මෙහිදී පිළිගත්තේය.

නමුත් ඒ සඳහා වෙනස් ප්‍රවේශයක් අවශ්‍ය බවට රජය මේ වන විට නිගමනය කර ඇති අතර, ඒ හේතුවෙන් ගුවන් සේවය සඳහා රාජ්‍ය-පෞද්ගලික හවුල්කාරිත්ව ආකෘතියක් වෙත යොමු වීමට තීරණය කළ බව ද අමාත්‍යවරයා වැඩිදුරටත් සඳහන් කළේය.