නාගරික සංවර්ධන අධිකාරියේ කොළඹ නාගරික පුනර්ජීවන ව්‍යාපෘතියේ ව්‍යාපෘති අධ්‍යක්ෂ ලෙස සේවය කළ, ශ්‍රී ලංකා හමුදාවේ විශ්‍රාමික බ්‍රිගේඩියර්වරයෙකු, නිවාස ඒකක වැරදි ලෙස වෙන්කිරීමේ චෝදනාව මත අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අත්අඩංගුවට ගෙන තිබේ.

අල්ලස් කොමිසමට අනුව, කොළඹ අඩු ආදායම්ලාභී පදිංචිකරුවන්ගේ ජීවන තත්ත්වය නංවාලීම සඳහා කැබිනට් මණ්ඩලය විසින් අනුමත කරන ලද වැඩසටහනක් යටතේ ඉදිකරන ලද “සිරිසඳ සෙවණ” නිවාස සංකීර්ණයේ මහල් නිවාස 22 ක්, සුදුසුකම් අවශ්‍යතා සපුරා නොමැති පුද්ගලයන්ට 2014 දී වෙන්කර ඇත.

අධිකාරියේ අධ්‍යක්ෂ මණ්ඩලයේ අනුමැතිය තිබියදීත්, පොදු ප්‍රතිපත්ති රාමුවෙන් පිටත මෙම වෙන්කිරීම් සිදුකර ඇති බව අල්ලස් කොමිසම පවසයි.

සැකකරු බ්‍රහස්පතින්දා (19) දහවල් 12:31ට පමණ අත්අඩංගුවට ගෙන පසුව කොළඹ ප්‍රධාන මහේස්ත්‍රාත් අධිකරණයට ඉදිරිපත් කරන ලද අතර පසුව ඔහු ඇප මත නිදහස් කර තිබේ.