ගලෙන්බිඳුණුවැව ප්‍රාදේශීය සභාවේ හිටපු සභාපති සමන්ත නාමල් විජේරත්න අල්ලස් හෝ දූෂණ චෝදනා විමර්ශන කොමිෂන් සභාවේ වත්කම් විමර්ශන අංශය විසින් අත්අඩංගුවට ගෙන තිබේ.

2011 සිට 2016 දක්වා සභාපති ධුරය දැරූ කාලය තුළ රැස්කර ගත් බව කියන පැහැදිලි කළ නොහැකි වත්කම් පිළිබඳ පැමිණිල්ලක් සම්බන්ධයෙන් ඔහු අත්අඩංගුවට ගෙන තිබේ.

විමර්ශකයන් පැවසුවේ, විමර්ශනය සම්බන්ධයෙන් ප්‍රකාශයක් සටහන් කර ගැනීම සඳහා කොමිසම හමුවේ පෙනී සිටින ලෙස විජේරත්නට දැනුම් දී තිබුණත් ඔහු නොපැමිණි බවයි.

ඒ අනුව, 2023 අංක 9 දරන දූෂණ විරෝධී පනතේ 126 සහ 127(1)(u) වගන්ති යටතේ ඔහු අත්අඩංගුවට ගෙන තිබේ.

පරීක්ෂණයකට සහයෝගය නොදැක්වීම හේතුවෙන් සැකකරු ඊයේ (24) කහටගස්දිගිලිය මහේස්ත්‍රාත් අධිකරණයට ඉදිරිපත් කරන ලද අතර ඔක්තෝබර් 31 දක්වා රක්ෂිත බන්ධනාගාර ගත කිරීමට එහිදී නියෝග කෙරිණි.