‘දිට්වා’ සුළි කුණාටුව හේතුවෙන් ඇති වූ දරුණු නායයෑම්වලින් පසු, මහනුවර දිස්ත්‍රික්කයේ හසලක නගරයට මායිම්ව පිහිටි පමුණුපුර ප්‍රදේශයේ ගම්මාන පහක් වහාම ක්‍රියාත්මක වන පරිදි, රජය විසින් තහනම් කලාප ලෙස ප්‍රකාශයට පත්කර තිබේ.

මහනුවර දිස්ත්‍රික් ආපදා කළමනාකරණ කමිටුවේ සහකාර අධ්‍යක්ෂ එල්.ඒ.කේ. රණවීර පැවසුවේ, ප්‍රදේශයේ විශාල භූමි ප්‍රමාණයක් අඩි 40 කට ආසන්න ගැඹුරකට කඩාවැටීමෙන් ගම්මාන මිනිස් වාසයට අනාරක්ෂිත බවට පත්වීමෙන් පසුව මෙම තීරණය ගත් බවයි.

එලෙස බලපෑමට ලක් වූ ගම්මාන වන්නේ උඩත්තාව, නෙළුම්මල, ගලනක, මඩකැලේ සහ උඩගල් දෙබොක්කාව ය.

උඩත්තාව ගම්මානයේ නිවාස 12 කට වැඩි සංඛ්‍යාවක් නායයෑමෙන් සම්පූර්ණයෙන්ම පොළවට වැසීගොස් ඇති අතර, මේ වන විට පදිංචිකරුවන් 26 දෙනෙකුගේ මළසිරුරු සොයාගෙන තිබේ.

කෙසේවෙතත් තවත් මළසිරුරු කිහිපයක් සුන්බුන් යට අඩි 30 සිට 40 දක්වා ගැඹුරේ සිරවී ඇති බවට විශ්වාස කෙරෙන බැවින්, අතුරුදහන්වූවන්ගේ නිශ්චිත සංඛ්‍යාව මෙතෙක් තහවුරු කර නොමැත.

ආරක්ෂක හේතූන් මත බලපෑමට ලක් වූ ගම්මානවල කැණීම් සහ ගොඩගැනීමේ මෙහෙයුම් තාවකාලිකව අත්හිටුවා ඇති බව මහනුවර දිස්ත්‍රික් ආපදා කළමනාකරණ කමිටුවේ සහකාර අධ්‍යක්ෂ එල්.ඒ.කේ. රණවීර පැවසුවේය.

මේ අතර, ජාතික ගොඩනැගිලි පර්යේෂණ සංවිධානයේ අධ්‍යක්ෂ ජනරාල් ඉංජිනේරු ආචාර්ය ආසිරි කරුණාවර්ධන පැවසුවේ, නායයෑම් අවදානමක් ඇති ප්‍රදේශවල නැවත පදිංචි කිරීම් සඳහා අවසර නොදෙන බවයි.

සවිස්තරාත්මක තක්සේරු කිරීම්වලින් පසු බලපෑමට ලක් වූ කලාපවල පදිංචිකරුවන් ආරක්ෂිත ස්ථාන කරා ගෙනයෑමට රජය තීරණය කර ඇති බව ද ඔහු පැවසීය.

අනාගත නායයෑම් අවදානම් තක්සේරු කිරීම සඳහා දියුණු ත්‍රිමාණ තාක්‍ෂණයේ සහාය ඇතිව ඉඩම් හඳුනාගැනීමේ වැඩසටහනක් දැනට ක්‍රියාත්මක වන බව ද ඔහු සඳහන් කරයි.

මොරටුව විශ්වවිද්‍යාලයේ සිවිල් ඉංජිනේරු පීඨයේ ජ්‍යෙෂ්ඨ මහාචාර්ය රංගික හල්වතුරගේ නායකත්වයෙන් යුත් ත්‍රිමාණ සමීක්ෂණයක්, යහන්ගල කන්ද සහ හසලක උගතාව සහ නෙළුම්මල ඇතුළු අවට ගම්මානවල වර්ග කිලෝමීටර් 10 ක් පමණ ආවරණය වන පරිදි දැනටමත් සිදුකර ඇත.